Сустрэча святароў у касцёле Божага Цела ў Нясвіжы распачалася з духоўнага настаўлення пробашча парафіі кс. каноніка Пятра Шарко, які ў дзень успаміну св. Андрэя Баболі засяродзіўся на асобе і духоўнасці гэтага руплівага святара, прапаведніка і мучаніка.
Андрэй Баболя адразу пасля прэзбітэрскага пасвячэння ў верасні 1622 г. прыехаў у Нясвіж, дзе на працягу года праходзіў заключны этап манаскай фармацыі — трэцюю прабацыю.
Пасля гэтага ён яшчэ на год затрымаўся пры касцёле Божага Цела ў Нясвіжы, дзе нёс служэнне рэктара гэтай святыні, першага ва ўсходняй Еўропе сакральнага будынка, узведзенага італьянскім архітэктарам езуітам Джаванні Марыяй Бэрнардоні ў стылі барока, якой духоўна апекаваліся айцы езуіты.
Арганізацыйную частку святарскай сустрэчы правёў генеральны вікарый Мінска-Магілёўскай архідыяцэзіі біскуп Юрый Касабуцкі, які таксама ўзначаліў перад гэтым цэлебрацыю Эўхарыстыі.
У гаміліі іерарх звярнуў увагу на неабходнасць імкнуцца да захавання еднасці ў Касцёле, чаму прысвяціў усё сваё жыццё святы Андрэй Баболя, прыняўшы ў імя адзінства Хрыстовых вучняў мучаніцкую смерць у страшэнных пакутах.
Падчас святой Імшы прысутныя на сустрэчы святары і кансэкраваныя асобы Мінска-Магілёўскай архідыяцэзіі, а таксама шматлікія вернікі нясвіжскай парафіі памаліліся аб здароўі для арцыбіскупа Тадэвуша Кандрусевіча, які не змог прыехаць у Нясвіж з-за хваробы.
Сёлета прыпадае 425-годдзе касцёла Божага Цела ў Нясвіжы. За ўвесь перыяд існавання святыня не зачынялася і служыла вернікам месцам сустрэчы з Хрыстом.
2 чэрвеня ў 11.00 у Нясвіжы адбудзецца юбілейная ўрачыстасць Найсвяцейшага Цела і Крыві Хрыста з працэсіяй Божага Цела, якую ўзначаліць Мітрапаліт Мінска-Магілёўскі арцыбіскуп Тадэвуш Кандрусевіч.
