26 красавіка ў Беларусі адзначылі 32-ю гадавіну Чарнобыльскай катастрофы. З гэтай нагоды ў Мінску прайшлі памятныя мерапрыемствы, у якіх як прадстаўнік Каталіцкага Касцёла ўзяў удзел кс. канонік Францішак Рудзь, пробашч сталічнай парафіі Маці Божай Будслаўскай.
Раніцай каля мемарыяльнай капліцы ў гонар іконы «Сысканне загінулых» у парку Дружбы народаў адбыўся мітынг-рэквіем, арганізаваны Мінскім гарадскім выканаўчым камітэтам. У ім узялі ўдзел ліквідатары аварыі на ЧАЭС, прадстаўнікі дзяржаўных уладаў розных узроўняў, дыпламатычных прадстаўніцтваў, рэлігійных супольнасцяў і іншых арганізацый.
Удзельнікі мерапрыемства ўшанавалі памяць усіх тых, хто пацярпеў як ад «мірнага атаму», так і ад ядзернай зброі, усклаўшы кветкі да памятных знакаў «Ахвярам Чарнобыля» і «Камень міру Хірасімы».
Увечары ў Мінску адбыўся традыцыйны Чарнобыльскі шлях на ўшанаванне ахвяраў найбольшай тэхнагеннай катастрофы мінулага стагоддзя. Яго ўдзельнікі прайшлі вуліцамі беларускай сталіцы ад кінатэатра «Кастрычнік» да парку Дружбы народаў, дзе адбыўся мітынг-малітва.
Ксёндз Францішак Рудзь у сваёй кароткай прамове ўзгадаў словы вядомага расійскага паэта Яўгенія Еўтушэнкі з верша «Мой госць — Чарнобыль»: «Усе катастрофы схаваны ўсярэдзіне нас…»
Святар адзначыў, што гадавіна Чарнобыльскай катастофы — гэта сумная дата ў гісторыі народаў. Яна нагадвае пра тое, што, хоць «мірны атам» можа прыносіць велізарную карысць, аднак падыходзіць да яго трэба з вялікай адказнасцю, бо ў выпадку аварыі, падобнай Чарнобыльскай, ад яе наступстваў пакутуе не адно пакаленне.
«Трагедыя Чарнобыля назаўсёды змяніла жыццё тых людзей, хто быў вымушаны пакінуць „зону адчужэння“; і тых, чые родныя загінулі, удзельнічаючы ў ліквідацыі наступстваў аварыі; і тых, хто з-за яе страціў здароўе. Гэтая трагедыя вымушае задумацца і адказна ставіцца да прыроды», — зрабіў выснову кс. Францішак.
Ён падкрэсліў, што Каталіцкі Касцёл робіць вялікі ўнёсак у абарону прыроды і чалавечага жыцця. Так, у 2015 г. папа Францішак выдаў дакумент Laudato si' — «Будзь праслаўлены, Пане», прысвечаны абароне створанага Богам свету, натуральнага асяроддзя жыцця чалавека. Святар нагадаў, што гэты дакумент быў прыняты напярэдадні візіту ў Рым ліквідатараў катастрофы на Чарнобыльскай АЭС, сярод якіх былі таксама беларусы.
«Мы павінны памятаць, што чалавек быў створаны не як абсалютны гаспадар стварэння, а як істота, адказная за тое, каб апрацоўваць і берагчы „сад свету“. І нічога новага ў адносінах да прыроды чалавецтва не прыдумала з часу свайго з’яўлення на Зямлі», — сказаў на заканчэнне ксёндз канонік.
Свой выступ ён завяршыў кароткім малітоўным заклікам:
«Захавай, Божа, родную Беларусь і ўсіх яе жыхароў ад трагедый!»
Пасля заканчэння мерапрыемстваў каля памятных знакаў у парку Дружбы народаў засталося шмат жывых кветак і запаленых знічоў на ўшанаванне ахвяраў катастрофы. Але гадавіна Чарнобыля — гэта не толькі даніна памяці ўсім тым, чыё жыццё заўчасна абарвалася ў выніку той страшэннай аварыі, але і заданне для наступных пакаленняў не даць «мірнаму атаму» зноў разбурыць жыццё і мары людзей.
