13 мая адбылося пасяджэнне Міжканфесійнага хрысціянскага рэлігійнага брацтва «Біблейскае таварыства ў Рэспубліцы Беларусь» (БТРБ). У пасяджэнні ўзялі ўдзел прадстаўнікі Касцёла: ксёндз канонік Ян Крэміс і ксёндз канонік Францішак Рудзь.
Сёння склад праўлення біблейскага таварыства ўключае 16 прадстаўнікоў розных хрысціянскіх канфесій у нашай краіне. Асноўнай яго задачай з’яўляецца міжканфесійнае супрацоўніцтва ў галіне рэлігійнай асветы, дабрачыннасць і выдавецкая дзейнасць.
На пасяджэнні асаблівая ўвага была звернута на забеспячэнне рэлігійнай літаратурай рэгіёнаў, пацярпелых ад аварыі на Чарнобыльскай АЭС.
Мінула ўжо больш за 25 гадоў пасля адной з самых страшных экалагічных катастроф у гісторыі чалавецтва. Больш за ўсё ад гэтай аварыі пацярпелі жыхары 21 раёна Гомельскай, Магілёўскай і Брэсцкай вобласцяў.
Псіхалагічна людзі збольшага прызвычаіліся да таго, што яны жывуць на «забруджаных» тэрыторыях, але ў іх заўсёды прысутнічае трывога за сваё здароўе і асабліва за здароўе дзяцей. Слова Божае не толькі паказвае жыццёвыя арыенціры для падрастаючага пакалення, але і дае суцяшэнне ў цяжкіх жыццёвых абставінах.
Біблейскае таварыства плануе аказаць дапамогу духоўнай літаратурай у першую чаргу дзецям, якія найбольш маюць патрэбу ў такой падтрымцы.
Бібліі атрымаюць дзеці-сіроты, якія пражываюць у дзіцячых дамах і школах-інтэрнатах; дзеці ў сацыяльных прытулках; дзеці-інваліды, аб’яднаныя ў рэгіянальныя Асацыяцыі дзяцей-інвалідаў; дзеці, якія наведваюць цэнтры карэкцыйна-развіваючага навучання; дзеці, якія наведваюць нядзельныя школы пры мясцовых парафіях.
На заканчэнне пасяджэння прадстаўнікі Касцёла падаравалі ў бібліятэку Таварыства памятную кнігу «Касцёлы Беларусі», выдадзеную з нагоды 30-годдзя Мінска-Магілёўскай архідыяцэзіі.
