Вербны кірмаш ў мінскай парафіі Св. Яна Евангеліста і Максімільяна Кольбэ (Кунцаўшчына/Масюкоўшчына), які прайшоў 25 сакавіка, у Пальмовую нядзелю, наведала 1060 чалавек.
Пра гэта Catholic.by расказаў пробашч парафіі кс. Алег Шпець TСhr. Кірмаш прайшоў ужо ў трэці раз і быў цалкам арганізаваны парафіянамі.
Чаго тут толькі не было: вербы, печыва, мёд, магніты, шмат вырабаў сваімі рукамі — хапала і прапановы, і попыту. Прадавалі нават расліны і расаду на вясну!
Акрамя таго, жадаючыя мелі магчымасць таксама набыць ружанцы, малітоўнікі і дзіцячую літаратуру.
«Сёлета можна трапіць і ў спіс ганаровых ахвярадаўцаў, ахвяраваўшы на будаўніцтва 1 квадратнага метра сцяны нашай будучай святыні», — прызнаўся святар.
Як дадаў пробашч, усе ахвяраванні, сабраныя падчас кірмаша, будуць накіраваныя на будаўніцтва парафіяльнага касцёла.
Асобна на кірмашы былі разыграныя сертыфікаты на фотасесію і візіт да майстра па манікюры. Таксама быў праведзены конкурс дзіцячых паштовак, многія з якіх здзіўлялі сваім увасабленнем і памерамі.
