Парафіяльны фэст св. Юзафа прайшоў у аднайменнай парафіі ў Маладзечне 19 сакавіка. Вечаровую святую Імшу ў гэты дзень тут узначаліў біскуп Аляксандр Яшэўскі SDB, дапаможны біскуп Мінска-Магілёўскай архідыяцэзіі і біскупскі вікарый для Магілёва і Магілёўскай вобласці.
У сваёй гаміліі іерарх засяродзіўся на асобе св. Юзафа.
«Юзаф як звычайны чалавек і Юзаф як святы, апякун і ахоўнік. Дзве адметныя рысы, уласцівыя святому Юзафу, — гэта добразычлівасць і цярплівасць. Менавіта такіх якасцей — сапраўдных каштоўнасцей — не хапае сучаснаму чалавеку».
Паводле слоў біскупа, бачыць найперш добрае у блізкім, суперажываць і быць побач — гэта павінна быць заданнем для вернікаў.
«Асоба св. Юзафа як узор і сапраўдны арыенцір дапаможа кожнаму жадаючаму атрымаць шчасце наблізіцца да святасці», — сказаў іерарх.
Біскуп прывёў яскравыя прыклады таго, як Бог дзейнічае ў жыцці, і заахвоціў таксама звяртацца да Езуса ў малітве простымі шчырымі словамі.
Адным з асаблівых момантаў урачыстасці стала адарацыя, падчас якой дзеці, моладзь і дарослыя складалі сімвалічныя дары. Найбольш кранальным момантам стала прынясенне ў якасці дара фігуркі белага галубка. Сімвал міру, веры і чысціні незвычайным чынам атуліў усіх прысутных, прымусіў усміхнуцца сумных і панурых.
Нават у вачах старэнькіх бабуль прамільгнуў праменьчык дзіцячай замілаванасці.
Пасля набажэнства біскуп сустрэўся з моладдзю і міністрантамі, і заахвоціў іх прыслухоўвацца да голасу свайго паклікання.
