27 студзеня ў цэнтры «Карытас» Мінска-Магілёўскай архідыяцэзіі ў Ляскоўцы адбылася аплаткавая сустрэча дапаможнага біскупа архідыяцэзіі Юрыя Касабуцкага з навучэнцамі і выкладчыкамі «Курсаў сямейнага жыцця» ў Мінску.
Сустрэча пачалася ўрачыстай святой Імшой. У гаміліі біскуп нагадаў, якім важным фактарам у духоўным жыцці хрысціяніна з’яўляецца давер Езусу Хрысту. Як адзначыў іерарх, нам можа здавацца, асабліва ў моманты, калі прыходзяць буры, што Езус спіць на карме нашага чаўна і мы застаёмся без дапамогі, аднак насамрэч Езус заўсёды чувае і ахоўвае нас.
Пасля супольнай малітвы навучэнцы 1-га курса прадставілі паэтычна-віншавальную праграму, якая складалася, між іншым, з аўтарскіх вершаў адной з іх, Інгі Садоўскай.
Пасля святочнай праграмы адбылося дзяленне аплаткай, калі ўсе мелі магчымасць скласці адзін аднаму віншаванні. Сустрэча прайшла ў вельмі адкрытай і радаснай атмасферы, калі кожны мог падзяліцца з іншым аплаткай і пачуць у свой адрас добрыя пажаданні.
Потым за агульным сталом з гарбатай і печывам сабраныя абмяркоўвалі вынікі мінулага года і дзяліліся вопытам.
