Дапаможны біскуп Гродзенскай дыяцэзіі Юзаф Станеўскі благаславіў каталіцкую капліцу пры раённым шпіталі ў Дзятлаве.
Іерарха пад гукі духавога аркестра з Наваельні ўрачыста сустракалі пры ўездзе на тэрыторыю бальніцы. Іерарха прывіталі пробашч кс. Здзіслаў Пікула, намеснік старшыні Дзятлаўскага райвыканкама Ігар Кухарэвіч і галоўны ўрач шпіталя Марыя Максімовіч.
У актавай зале бальніцы біскуп цэлебраваў святую Імшу. «Усе ідуць у Бэтлеем, каб пакланіцца Пану Езусу. Сёння мы можам назваць Бэтлеемам і гэтае месца ў бальніцы, дзе народзіцца Хрыстус і застанецца тут. Кожны, хто шукае да Яго дарогу, хто просіць дапамогі, зможа прыйсці і пакланіцца Яму». Іерарх падзякаваў людзям у белых халатах, якія штодзень трываюць тут у сваім пакліканні, дапамагаючы людзям.
Біскуп звярнуў увагу, што ў многіх шпіталях і вязніцах ёсць капліцы, каб чалавек меў месца і магчымасць звярнуцца да Бога. Менавіта прысутнасць капліцы — прысутнасць Бога ў такіх месцах — паводле слоў іерарха, вельмі важная і значная.
«Нават уначы ў капліцах заўсёды нехта ёсць, хто моліцца, звяртаючыся да Бога, і тады яму лягчэй з Езусам ісці на аперацыйны стол, а ўрачу — браць у рукі скальпель», — зазначыў біскуп.
«Сёння тут пачынаецца новая гісторыя. Але ці зменіцца падыход да дактароў, пацыентаў — залежыць ад нас. Няхай гэтае святое месца будзе месцам поўнага даверу Езусу Хрысту нашага жыцця», — заключыў біскуп Юзаф Станеўскі.
Біскуп благаславіў капліцу, размешчаную на трэцім паверсе шпіталя, у гонар Маці Божай з Люрда.
