22 снежня ў капліцы Вышэйшай духоўнай семінарыі ў Гродне ў межах аплаткавай сустрэчы духавенства Гродзенскай дыяцэзіі адбылася святая Імша ў інтэнцыі кс. Тадэвуша Вышынскага CM у першую гадавіну яго смерці.
Ксёндз Вышынскі шмат гадоў быў выкладчыкам у семінарыі ў Гродне.
Літургію ўзначаліў біскуп Гродзенскі Аляксандр Кашкевіч. У ёй удзельнічалі дапаможны біскуп Гродзенскай дыяцэзіі Юзаф Станеўскі, шматлікія святары і сёстры законныя.
Падчас Імшы біскуп Кашкевіч адзначыў, што смерць кс. Тадэвуша Вышынскага, які загінуў у аўтакатастрофе роўна год таму, з’яўляецца вялікай стратай для мясцовага Касцёла. Іерарх дадаў, што спачылы святар зрабіў вельмі шмат дабра для развіцця Касцёла на Гродзеншчыне, асабліва ў фармацыі будучых святароў.
“Нягледзячы на тое, што ўжо год кс. Тадэвуша няма з намі фізічна, яго прысутнасць ёсць з намі ў іншым вымярэнні. Дзякуем памерламу святару за тое, што сваёй асобай і руплівым служэннем узбагаціў наш мясцовы Касцёл на Гродзеншчыне, у справы якога ўключаўся ўсім сэрцам”, – сказаў біскуп.
Ксёндз прафесар Тадэвуш Вышынскі загінуў 23 снежня 2016 г. у Гродне ў выніку аўтамабільнай аварыі. Святарскае служэнне ў Гродне распачаў у 1992 г. На працягу ўсіх гэтых гадоў выкладаў дагматычную тэалогію і спевы ў Вышэйшай духоўнай семінарыі ў Гродне.
Удзельнічаў у сходах Гродзенскай дыяцэзіі і Мінска-Магілёўскай мітраполіі, на якіх рыхтаваліся навуковыя і душпастырскія дапаможнікі, літургічныя кнігі.
