«З нагоды святаў Божага Нараджэння, а таксама надыходзячага Новага 2018 года, жадаю ўсім вернікам і людзям добрай волі глыбокай веры, надзеі і любові», — піша біскуп.
«Не бойцеся! Я абвяшчаю вам вялікую радасць:
нарадзіўся сёння Збаўца, якім ёсць Хрыстус Пан»
(Евангелле паводле Лукі 2, 10)
Дарагія ў Хрысце браты і сёстры!
Добрая Вестка, якую анёл абвясціў пастушкам у Бэтлееме, ужо больш за два тысячагоддзі напаўняе радасцю і надзеяй мільёны людзей незлічоных пакаленняў. Гэтая радасць вынікае з факту Нараджэння Езуса Хрыста — Божага Сына і Збавіцеля чалавека. Ён прыйшоў у свет надзвычай сціпла, як хтосьці даступны і вельмі блізкі.
Святкуючы гэтую таямніцу прысутнасці Бога сярод нас, мы імкнёмся сустрэцца з самымі блізкімі нам асобамі: роднымі, сябрамі і знаёмымі, каб яшчэ раз выказаць ім словы найлепшых пажаданняў і раздзяліць з імі калядную радасць.
З нагоды святаў Божага Нараджэння, а таксама надыходзячага Новага 2018 года, жадаю ўсім вернікам і людзям добрай волі глыбокай веры, надзеі і любові. Няхай міласэрны Бог адорыць кожнага моцным здароўем, шчасцем, зычлівымі людзьмі і поспехамі ў кожным пачынанні.
Радасных святаў! Хрыстус нарадзіўся! Славім Яго!
З пастырскім благаслаўленнем,
+ Антоні Дзям’янка
Біскуп Пінскі
Пінск, 20.12.2017 г.
