Збаўца нарадзіўся! Няхай кожнае сэрца адчуе гэтае цяпло Немаўляці, напоўніцца ім і перадасць іншаму! Дарагія нашыя чытачы, у гэтыя святочныя дні няхай Бог напаўняе вашыя сэцы радасцю і вялікай любоўю, адорвае моцнай верай і надзеяй на лепшае, а таксама дае моцы і мужнасці ісці за Ім да канца. З Божым Нараджэннем!
Мяккім снегам поўніцца ціша,
Цяпло свечкі грэе руку.
У спакоі, абноўленым, чыстым
Зазірні ў нябёс вышыню!
Там далёка, у сэрцы нябёсаў
Гарыць зорка і вабіць душу
У спляценні пранізлівых лёсаў
Абвяшчае нам праўду адну.
Што ў стайні, у Бэтлееме
Нарадзіўся нам Збаўца Хрыстос,
Каб прынесці для сэрцаў Збаўленне,
Каб ачысціць ад хмараў наш лёс.
Каб, адкінуўшы тлум і нянавісць,
Пафас думак, бляск мітусні,
Нагаворы, паклёпы і зайздрасць
Мы ў любові стваралі масты.
Той любові, што ўздымае,
Нясе мір, супакой і дабро,
Што за Праўду мужна трывае,
Не шукае ніколі свайго...
У святле Немаўляці Езуса
Хай жа нішчыцца цемра і зло,
Каб да сэрцаў Бог дакрануўся
І прыйшло Валадарства Яго.
