Старшыня партугальскага епіскапату — Патрыярх Лісабона кардынал Мануэл Жазэ Макарыу Кляменці — у размове з прадстаўнікамі мясцовых СМІ адзначыў, што прысвечанае Богу жыццё не прызначана для людзей з гомасексуальнымі схільнасцямі.
«Такім людзям я не раю паступаць у семінарыі. Гэта для іх неадпаведнае месца. Яны прабываюць у вельмі далікатнай сітуацыі», — сказаў кардынал.
Іерарх дадаў, што новая праграма душпастырскай працы ў Партугаліі, распрацаваная біскупамі для павелічэння колькасці пакліканняў да святарскага служэння, прадугледжвае псіхалагічныя тэсты для тых, хто хоча стаць семінарыстам.
Тэсты, сярод іншага, павінны выявіць сярод кандыдатаў у семінарыю людзей, якія маюць гомасексуальныя схільнасці.
На сёння ў партугальскіх духоўных семінарыях каля 500 семінарыстаў рыхтуюцца да прэзбітэрскага пасвячэння. Паводле даных Канферэнцыі Каталіцкіх Біскупаў у Партугаліі, у 2000 годзе ў краіне было 547 семінарыстаў, праз 12 гадоў — 474. У 2015 годзе іх колькасць дасягала 551.
