У Брэсце на перакрыжаванні вуліц Кірава і Пушкінскай вядуцца падрыхтоўчыя работы да ўсталявання помніка Бібліі. Узвядзенне помніка прымеркавана да 500-годдзя айчыннага кнігадрукавання і выдання Бібліі Францішкам Скарынам. Пра гэта паведамляе krynica.info са спасылкай на virtualbrest.by.
У план работ уваходзіць добраўпарадкаванне прылеглай тэрыторыі і насціл ходнікаў. На сцяне бібліятэкі, ля якой будзе ўсталяваны помнік, плануецца графіці на тэму кнігадрукавання.
Работы мяркуецца скончыць да канца лістапада.
Эскізны праект помніка брэсцкай Бібліі абраў абласны мастацка-экспертны савет па манументальным i манументальна-дэкаратыўным мастацтве. Ад аўтараў паступіла 10 эскізных варыянтаў, розных па форме і змесце. Большасцю галасоў экспертнага савета выбраны праект мінчаніна Антона Нічыпарука. Ён прапанаваў усталяваць помнік у выглядзе стылізаванай раскрытай кнігі з адбіткам ілюстрацый і датай выдання брэсцкай Бібліі.
