17-18 лістапада дзявяты раз у Жодзіне сабраліся міністранты з розных куткоў Беларусі: Жодзіна, Барысава, Мінска (з парафій у Сухараве і Кунцаўшчыне), Друі, Оршы, Маладзечна і Крупак. Першы раз гэтая сустрэча прайшла не проста ў парафіі, але ў санктуарыі Маці Божай Фацімскай.
Больш за 100 хлопцаў розных узростаў сабраліся, каб правесці гэты час разам, праславіць Бога ў малітве і міністранцкім служэнні, а таксама пазмагацца ў спартыўных і інтэлектуальных спаборніцтвах.
Пасля супольнай Эўхарыстыі шлях удзельнікаў сустрэчы распачаўся з віктарыны «Што? Дзе? Калі?». Вечарам хлопцаў чакала міністранцкая «коўзанка» — жодзінскі каток.
Наступны дзень быў вельмі насычаны. Пасля святой Імшы распачаўся турнір па міні-футболе ў спартыўным комплексе БелАЗа «Асілак». 4 старэйшыя і 7 малодшых каманд змагаліся за перамогу. За 4 гадзіны было праведзена 18 матчаў.
Пазней хлопцам трэба было прыгадаць усё, чаму яны вучыліся на сустрэчах для міністрантаў, бо распачаўся конкурс літургічных ведаў. Апошнiм пунктам змаганняў стала барацьба ў катэгорыях «камандная эстафета» і «настольны тэнiс».
Сустрэча міністрантаў скончылася доўгачаканай цырымоніяй узнагароджвання. У агульным заліку па выніку ўсіх гульняў перамогу атрымала каманда з парафіі Беззаганнага Зачацця Найсвяцейшай Панны Марыі ў Мінску (мкр. Сухарава).
Каманды-пераможцы розных спаборніцтваў турніра:
- «Што? Дзе? Калі?» — Маладзечна
- Футбол (старэйшыя) — Мінск (Кунцаўшчына)
- Футбол (малодшыя) — Мінск (Сухарава)
- Конкурс літургічных ведаў — Барысаў
- Настольны тэнiс — Маладзечна
- Эстафета — Мінск (Сухарава)
Агульны залік:
- 1 месца — Мінск (Сухарава)
- 2 месца — Мінск (Кунцаўшчына)
- 3 месца — Маладзечна і Жодзiна
