У сваёй прамове падчас прэзентацыі Новага Запавету на беларускай мове, якая прайшла ў Мінску 15 лістапада, Мітрапаліт Мінска-Магілёўскі арцыбіскуп Тадэвуш Кандрусевіч адзначыў значнасць гэтай кнігі.
«Я перакананы, што выданне кнігі Новага Запавету будзе спрыяць далейшаму развіццю душпастырства, асабліва евангелізацыі, у Беларускай Праваслаўнай Царкве і ўнясе свой важкі ўклад у развіццё беларускай культуры. Яно будзе карысна і Каталіцкаму Касцёлу, які таксама шмат увагі прысвячае выданню тэалагічнай, біблійнай, літургічнай і гістарычнай літаратуры на беларускай мове», — адзначыў іерарх.
«Як бачна, нашы Цэрквы-сёстры годна ўшаноўваюць юбілей 500-годдзя выдання Скарынаўскай Бібліі. Гэтым самым яны даюць нашаму народу Божае слова на яго роднай мове, так, як гэтага прагнуў наш славуты зямляк», — заключыў арцыбіскуп.
