12 лістапада ў Ражанцы ў касцёле святых апосталаў Пятра і Паўла прайшла парафіяльная ўрачыстасць Маці Божай Вострабрамскай. Абраз Маці Божай змешчаны на галоўным алтары святыні.
У гэты дзень для парафіянаў выступіў музычны гурт Вышэйшай духоўнай семінарыі ў Гродне Ave.
Семінарысты аздобілі літургію музычным суправаджэннем, спрабуючы праз музыку падзяліцца найкаштоўнейшым у іх жыцці — верай, якая ўзрастае ў выпадку, калі імкнешся распаўсюджваць яе і перадаваць іншым. Менавіта гэтым прагненнем дзяліцца верай з бліжнімі быў прасякнуты рэпертуар семінарыйнага гурта.
На нядзельныя Імшы ў Ражанцы прыходзяць каля 150 чалавек. На выступленне Ave прыбыло больш за 200 вернікаў.
«Парафіяне былі вельмі задаволеныя. Асноўную частку нашай парафіі складаюць пажылыя вернікі, таму выступленне Ave з іх творамі стала для іх адмысловым амаладжэннем і духоўным адпачынкам», — расказаў Catholic.by пробашч кс. Юрый Фядук.
