![](/3/images/news/2017/11/2017-01-18-nuncio-008.jpg)
Напэрэдадні 25-годдзя ўстанаўлення дыпламатычных адносін паміж Святым Пасадам і Рэспублікай Беларуссю арцыбіскуп Габар Пінтэр, Апостальскі Нунцый у Беларусі, на прыватнай аўдыенцыі сустрэўся з Папам Рымскім.
У межах свайго візіту ў Мінск іерарх сустракаўся з міністрам замежных спраў Рэспублікі Беларусь Уладзімірам Макеем.
У каментарыі для Ватыканскага радыё Апостальскі Нунцый адзначыў, што, нягледзячы на «наяўнасць пытанняў, якія яшчэ патрабуюць вырашэння», адносіны паміж Беларуссю і Апостальскай Сталіцай можна назваць выдатнымі.
Падчас сустрэчы з Пантыфікам сярод шэрагу пытанняў абмяркоўваўся таксама магчымы візіт Папы ў Беларусь.
«Магу пацвердзіць, што гаворка ішла таксама і пра гэта. Мы шмат працуем, каб візіт адбыўся. Хачу папрасіць усіх маліцца ў гэтай інтэнцыі, бо сітуацыя яшчэ не зусім ідэальная, але мы спадзяемся, што хутка гэты момант наступіць. Усе гэтага жадаюць, мы ўсе гэтага жадаем», — сказаў арцыбіскуп Пінтэр.
Па словах іерарха, Пантыфік уразіў яго глыбокім веданнем сітуацыі ў Беларусі.
«Да майго вялікага захаплення, Папа вельмі добра праінфармаваны аб Беларусі. Канешне, я ведаў аб гэтым, бо ўжо ў мінулым годзе мы з ім размаўлялі, пасля майго прызначэння, і я меў магчымасць пераканацца, што ён добра разбіраецца. Але ў гэты раз ён мяне ўразіў тым, што яго веды вельмі падрабязныя і дэталёвыя. Ён з вялікай увагай сочыць за падзеямі ў Беларусі», — сказаў Апостальскі Нунцый.