Каля 60 маладых людзей са Шчучына і Ліды сабраліся ў парафіі Св. Тэрэзы Авільскай у Шчучыне, каб паразважаць над тэматыкай запланавага Сіноду на тэму моладзі. Сустрэча праходзіла 5-6 лістапада.
У кастрычніку 2018 года адбудзецца Сінод Біскупаў на тэму «Моладзь, вера і распазнанне паклікання». Ордэн піяраў як частка супольнасці Каталіцкага Касцёла таксама вырашыў далучыцца да перадсінадальнай падрыхтоўкі. Кіраўніцтва Польскай правінцыі ордэна піяраў плануе правесці ў маі 2018 года Піярскі сінод маладых у Варшаве. А падрыхтоўка ў Беларусі распачалася значна раней – з моладзевай сустрэчы ў Шчучыне.
На пачатку сустрэчы а. Гжэгаж Ксёнжэк SP прамовіў для моладзі ўводную канферэнцыю, падчас якой закрануў наступныя пытанні: «Што значыць па-сапраўднаму верыць?», «Што мы павінны рабіць, каб распазнаць сваё пакліканне?» Святар адзначыў, што па-сапраўднаму верыць той, хто да канца застаецца верным Богу.
Каб адказаць на пытанне пра распазнанне паклікання, а. Ксёнжэк звярнуўся да гісторыі паклікання апосталаў. «Ніхто з апосталаў не ведаў, што іх чакае, калі яны пойдуць за Хрыстом. Але яны рызыкнулі і не памыліліся. Таму рызыкніце, паверце, цвёрда трымайцеся свайго выбару і мужна ідзіце да канца. Лепш зрабіць памылку, чым стаяць на месцы», — заклікаў святар.
Пасля канферэнцыі і святой Імшы моладзь была падзелена на чатыры групы. Кожнай групе была прапанавана да разважання адна з чатырох тэм: «вера», «распазнанне», «пакліканне», «супольнасць». Так, напрыклад, моладзь, якая разважала над тэмай «вера», спрабавала адказаць на наступныя пытанні: «Што мне дапамагае, а што перашкаджае верыць? Што магу зрабіць я і супольнасць Касцёла, каб людзі вярнуліся да вызнавання моцнай веры?»
Пасля працы ў групах моладзь абмеркавала атрыманыя вынікі.
