9 кастрычніка ў парафіі Унебаўзяцця Найсвяцейшай Панны Марыі ў Дзярэчыне прайшла сустрэча з братам Жан-Данiэлем з супольнасці Тэзэ ў Францыі.
У гісторыі парафіі такі незвычайны госць наведаў яе ўпершыню.
Малітва ў духу Тэзэ прайшла пасля вечаровай Імшы, якую ўзначалiў пробашч парафіі кс. Яўген Учкуронiс разам з айцом Вiталiем Слукой SP з ордэна пiяраў. У Імшы прымаў удзел таксама дэкан Слонiмскага дэканата кс. Iгар Анісімаў, а таксама госці і вернікі з іншых парафій Гродзеншчыны.
Малітва ў духу Тэзэ
Цені запаленых свечак усцiлалi шлях да сiмвала Збаўлення усiх хрысцiянаў — драўлянага крыжа, перад якiм на каленях у белым адзеннi схiлiўся брат Жан-Даніэль.
Ад святла свечак святыня нiбы заззяла на вечаровым небасхiле. Твары людзей пагрузiлiся ў глыбокi роздум сумеснай малiтвы. У касцёле спяваў хор, іграў арган і гітара. Пранiкліся ўсе. Здаецца, спявалi не вусны, а сэрцы. На розных мовах, але падкрэсліваючы галоўную мэту хрысцiянства: Хрыстус — наш адзiны Збаўца, наша дарога да Бога.
Напрыканцы малiтвы прайшла адарацыя крыжа, дзе кожны мог даручыць Богу свае патрэбы i малітвы.
Пасля малітвы ўсе сабраліся на сустрэчу з братам Жанам-Даніэлем — вельмi простым i вясёлым чалавекам з глыбокiм кругаглядам i шчырым сэрцам. Вельмi хочацца, каб брат Жан-Данiэль разам з салодкімі прысмакамi i прыгожай выявай Дзярэчынскага касцёла забраў з сабой i часцiнку нашых усхваляваных сэрцау, каб падзяліцца нашай верай з iншымі хрысцiянамi сусвету.
Удзельнікі сустрэчы выказваюць падзяку кс. Яўгену Учкуронiсу за арганізацыю.
