5 кастрычніка Мітрапаліт Тадэвуш Кандрусевіч наведаў Беларускі дзяржаўны ўніверсітэт культуры і мастацтваў.
У межах візіту каталіцкі іерарх прыняў удзел у пасяджэнні навуковай рады, якая сабралася на абарону кандыдацкай дысертацыі Веранікі Раманенкавай на тэму «Рымска-каталіцкая пасхальная царкоўная і бытавая традыцыі ў Беларусі: мастацтвазнаўчая рэканструкцыя».
Падчас абмеркавання арцыбіскуп распавёў пра руплівы клопат Касцёла аб захаванні мастацкай спадчыны, зазначыўшы, што хрысціянская традыцыя з’яўляецца адным з элементаў, які служыць захаванню і перадачы веры. Іерарх ацаніў унёсак мастацтвазнаўцаў у працэс новай евангелізацыі, а таксама выказаў удзячнасць за працу даследчыцы, выразіўшы ўпэўненасць, што яе даследаванні насамрэч актуальныя і запатрабаваныя.
