З 23 па 27 жніўня ў парафіі Св. Міхала Арханёла ў Навагрудку ўпершыню адбылася музычная майстэрня для дзяцей, моладзі і дарослых.
Як адзначыў ксёндз Юрый Жэгарын, гэта мерапрыемства дае магчымасць праз веру выразіць спевам і музыкай тое, што немагчыма выразіць словамі, а таксама адчуць блізкасць і любоў Бога і дакрануцца сэрцам да Яго прыгажосці.
Наведвальнікамі музычнай майстэрні сталі моладзевы гурт «Veni», які дзейнічае пры парафіяльным касцёле Св. Міхала Арханёла, удзельнікі парафіяльнага хору, а таксама іншыя юныя і дарослыя парафіяне. Сустрэчы і майстар-класы, якія праходзілі на працягу некалькіх дзён, правялі ўдзельнікі музычнай супольнасці «Ubi Caritas» з Івянца на чале з духоўным кіраўніком айцом Яўгенам Голубам, а таксама арганіст касцёла Св. Міхала Яўгеній Пяцельчыц і яго вучаніца Ірына Букіна. Дапамогу ў арганізацыі працы майстэрні аказала дырэктар цэнтра творчасці дзяцей і моладзі Алена Аскерка.
Кульмінацыяй і плёнам музычнай майстэрні быў заключны канцэрт праслаўлення, які адбыўся 26 жніўня, а на наступны дзень – урачыстая святая Імша, якая сабрала каля 130 дзяцей і моладзі.
Некаторыя ўдзельнікі майстэрні падзяліліся сваімі ўражаннямі. Барабаншчык парафіяльнага гурта «Veni» Данііл Сакевіч адзначыў, што «дзякуючы майстэрні засвоіў некалькі прыгожых рытмаў і павучыўся адпаведнай тэхніцы гульні».
Усе ўдзельнікі выказалі надзею, што такое мерапрыемства стане традыцыйным і будзе ладзіцца штогод.
