23-25 чэрвеня ў Баранавічах прайшоў ІІ Агульнабеларускі кангрэс сем’яў. Форум быў прысвечаны тэме адносін у сям’і. Арганізатарам кангрэсу выступіла Рада па справах сям’і пры Канферэнцыі Каталіцкіх Біскупаў у Беларусі.
У кангрэсе прыняло ўдзел каля 100 чалавек, у тым ліку дарадчыкі сямейнага жыцця, сямейныя кансультанты, удзельнікі курсаў сямейнага жыцця і іншыя, зацікаўленыя сямейнай тэматыкай.
Распачаўся кангрэс малітвай на чале з біскупам Пінскім Антоніем Дзям’янкам, які з’яўляецца старшынёй Рады па справах сям’і пры епіскапаце Беларусі.
Адкрываў кангрэс даклад біскупа Пінскага, у якім іерарх гаварыў пра прыклад Святой Сям’і, а таксама прыгадаў апошні дакумент Сіноду біскупаў Amoris leticiae, які акрэслівае важнейшыя моманты ў сямейным душпастырстве.
![](/3/../2/images/stories/news/2017/06/2/2017-06-26-frashtenga1.jpg)
Таксама былі абмеркаваны праблемы, з якімі сутыкаюцца муж і жонка ў сужэнскім жыцці, а таксама спосабы іх вырашэння.
У другі дзень кангрэса перад прысутнымі выступілі рэктар Міждыяцэзіяльнай духоўнай семінарыі імя Зыгмунта Лазінскага ў Пінску кс. Андрэй Рылка, які прадставіў філасофскую канцэпцыю чалавека апошніх стагоддзяў.
«Найважнейшай і актуальнай для нас з’яўляецца хрысціянская канцэпцыя, паводля якой чалавек з’яўляецца асобай недасканалай — г.зн. індывідуальнай і разумнай субстанцыяй», — заўважыў лектар.
Як дадаў кс. Андрэй Рылка, заданнем чалавека як асобы з’яўляецца выхад з унутранага свету ў свет знешні і кантакт з іншымі людзьмі, а «вяршыняй усіх адносін з’яўляюцца адносіны з Богам».
Псіхолаг і хрысціянскі псіхатэрапеўт Наталля Пан распавяла прысутным пра «камунікацыю з сабою». Слухачы маглі адказаць на пытанне: як часта мы размаўляем з канкрэтным чалавекам, а як часта толькі са сваімі фантазіямі пра таго чалавека?
![](/3/../2/images/phocagallery/2017/06/2017-06-26-frashtenga/thumbs/phoca_thumb_l_semji-011.jpg)
Таксама на кангрэсе былі абмеркаваны адрозненні ў адносінах паміж мужчынам і жанчынай, а таксама прынцып пабудовы добрых адносін паміж бацькамі і дзецьмі.
У прыватнасці, была падкрэслена важнасць таго, каб даваць дзецям пачуццё бяспекі, давяраць сваім і любіць іх бескарысна, паказваць прыклад узаемнай любові бацькоў, даць дзецям магчымасць пакінуць бацькоўскі дом, што эмацыйна і фізічна можа быць добрай умовай для таго, каб быць добрым бацькам ці маці ў будучыні.
Асобная ўвага была ўдзелена тэме камунікацыі з усыноўленымі дзецьмі.
Зазначалася, што ад таго, якім будзе свет сям’і, будзе залежаць будучыня ўсыноўленага дзіцяці. Таму вельмі важна, прымаючы ў сям’ю чалавека, дапамагаць яму ў адкрыцці ў сабе таго дабра, якое ў ім ёсць.
Удзельнікі кангрэсу маглі таксама ананімна задаць асабістыя пытанні дакладчыкам.
Апошні дзень кангрэсу распачаўся св. Імшой, якую цэлебраваў а. Віталій Сапега ОР, душпастыр сем’яў Віцебскай дыяцэзіі. Пазней адбывалася праца ў групах, дзе ўдзельнікі разважалі на тэму канфліктаў у сям’і і спосабаў іх вырашэння.
![](/3/../2/images/phocagallery/2017/06/2017-06-26-frashtenga/thumbs/phoca_thumb_l_semji-008.jpg)
Арганізатары кангрэса выказваюць падзяку ўсім тым, хто прычыніўся да таго, каб гэты кангрэс адбыўся.