XIII Міжнародная медыцынская канферэнцыя на тэму «Праблемы ўрачэбнай этыкі ў сучасным свеце» прайшла 9 і 10 чэрвеня ў Віцебску.
Сярод удзельнікаў канферэнцыі былі прафесар Папскай акадэміі навук мансеньёр Жак Судо, дырэктар гінекалогіі ўніверсітэцкай клінікі «Агасціна Джамелі» і дырэктар Міжнароднага навуковага інстытута Паўла VI Каталіцкага ўніверсітэта Святога Сэрца ў Рыме прафесар Рыкарда Марана, а таксама вучоныя, медыкі і святары з Беларусі, Расіі, Польшчы і Шры-Ланкі.
На канферэнцыі былі абмеркаваныя пытанні педыятрыі, духоўныя аспекты барацьбы з абортамі і эўтаназіяй, а таксама Хартыя супрацоўнікаў аховы здароўя, прынятая ў Ватыкане ў лютым 2017 года.
Вітальнае слова да ўдзельнікаў канферэнцыі падчас яе адкрыцця прамовіла начальнік упраўлення аховы здароўя Віцебскага аблвыканкама Андрэй Андрушкін і біскуп Віцебскі Алег Буткевіч.
«Мы павінны адмовіцца ад гульні ў Бога»: некаторыя аспекты з дакладаў удзельнікаў канферэнцыі
Прафесар Рыкарда Марана прадставіў вынікі даследаванняў на тэму «Медыцына фертыльнасці і жаночае рэпрадуктыўнае здароўе». Мансеньёр Жак Судо з Францыі выступіў з дакладам «Ідэальнае дзіця».
«Якасці, якія мы хочам бачыць у дзіцяці, не могуць быць атрыманы праз налады некалькіх нуклеацідаў. Дзіця патрабуе любові, цярплівасці, клопату і прысутнасці вакол сябе бацькоў, уключаючы бацьку. Думаць інакш — гэта пераацэньваць разуменне біялогіі і ролю генаў у вызначэнні таго, кім мы з’яўляемся. Мы павінны адмовіцца ад гульні ў Бога», — адзначыў французскі дакладчык.
Дамініканін Віталій Сапега OP прадставіў асноўныя моманты «Хартыі супрацоўнікаў аховы здароўя», якая прапаноўвае прынцыпы, якія дазваляюць прымаць правільнае этычнае рашэнне згодна з вучэннем Хрыста і Касцёла.
Праблемам прафілактыкі і лячэння туберкулёзу былі прысвечаны даклады медыкаў са Шры-Ланкі.
Біскуп Алег Буткевіч узначаліў св. Імшу ў касцёле Святога Духа, падчас якой маліўся за ўдзельнікаў канферэнцыі, а таксама ўсіх медработнікаў, дзякуючы ім за міласэрнасць, ахвярнасць і нялёгкую працу.
