26 чэрвеня Лучайская парафія адсвяткавала Дзень сям'і. Свята ладзіцца па ініцыятыве пробашча кс. Мікалая Ліпскага ў апошнюю нядзелю чэрвеня пяты год запар.
У нядзельны спякотны дзень муры 250-гадовай святыні атулілі сабраных вернікаў прыемнай прахалодай. Напачатку пробашч прачытаў даклад на тэму сям'і. Святар засяродзіў увагу прысутных на тым, што Бог — творца сужэнстваў.
Ксёндз Мікалай нават прывёў статыстычныя даныя разводаў, на якія ўплываюць такія фактары, як удзел у нядзельнай святой Імшы і супольная малітва. Сацыёлагі сведчаць, што найбольш моцныя і трывалыя тыя сем'і, якія жывуць ў блізкім кантакце з Богам.
Падчас адарацыі была прачытана Літанія да святога Юзафа – апекуна сем'яў. Вернікі маліліся аб трываласці і здароўі сваіх сем'яў і за сем'і сваіх блізкіх.
Святочную гамілію пробашч Лучая прысвяціў тэме вернасці ў сямейным жыцці. Святар звярнуў увагу на тое, як важна быць верным словам шлюбнай прысягі, якую маладыя сужонкі прамаўляюць перад Богам.
Згодна з традыцыяй, якая склалася за пяць гадоў, неад'емная частка лучайскіх святаў — канцэрт. На гэты раз падараваў прысутным канцэртную праграму часты і заўсёды жаданы госць парафіі — знакаміты беларускі бард Зміцер Вайцюшкевіч. Звычайна музыкант не рыхтуе спецыяльны спіс песень, а спявае тыя, што на душы ў яго пры сустрэчы са слухачамі, або выконвае па замове.
Музыкант праспяваў творы на вершы беларускіх літаратараў: Пятруся Броўкі, Генадзя Бураўкіна, Адама Русака, Уладзіміра Караткевіча, Алеся Камоцкага, Уладзіміра Някляева, а таксама выканаў «Грузінскую песню» выбітнага расійскага барда Булата Акуджавы.
Скончылася канцэртная праграма паланэзам «Развітанне з Радзімай» Міхала Клефаса Агінскага на словы Сяржука Сокалава-Воюша. Музычны твор славутага кампазітара амаль абавязковая праграма канцэртных праграм лучайскага свята. Тут не забываюць пра Агінскіх – фундатараў святыні, дзякуючы якім вёска мае велічную святыню, і пра іх знакамітага нашчадка.
Наступны раз Лучай чакае гасцей 23 ліпеня на фэст святой Ганны, падчас якога асаблівым чынам будзе адзначацца 250-годдзе святыні.
Алена Клімза-Колтан (АлГ)
