У парафіі Беззаганнага Сэрца Марыі ў Оршы стала традыцыяй сустракаць байкераў з Польшчы. Кожны год сюды прыязджаюць байкеры таварыства Рэйду Усход-Захад, а кожны другі год — таварыства Міжнародны Катыньскі Рэйд. 23 чэрвеня байкеры таварыства Рэйду Усход-Захад вярталіся з Масквы і наведвалі месцы, звязаныя з жыццём польскіх дзеячаў культуры.
У аршанскай парафіі называюць вельмі прыемным тое, што байкеры не толькі ўносяць уклад у веру людзей, асабліва на ўсходніх межах нашай краіны, праз свае пілігрымкі, але і канкрэтнымі справамі дапамагаюць іншым людзям, парафіям.
На пачатку сустрэчы з байкерамі адбылася малітва ў капліцы, пасля яны наведалі касцёл, які будуецца побач. Парафіяне падрыхтавалі для гасцей пачастунак.
«Мы ўдзячныя Богу і людзям, што можам быць на шляху байкераў і выконваць свае чалавечыя паслугі ў дапамозе бліжняму. Гасціннасць заўсёды добра характарызуе нас, беларусаў», — адзначаюць у аршанскай парафіі.
(AG)
