14 жніўня, пасля ўшанавання памяці ахвяр Лупалаўскага канцлагера на мемарыяльным комплексе ў Магілёве, Апостальскі Нунцый у Рэспубліцы Беларусь арцыбіскуп Іньяцыё Чэффаліа разам з Мітрапалітам Юзафам Станеўскім і біскупам Аляксандрам Яшэўскім SDB выказаў жаданне асабіста пазнаёміцца з жыццём каталіцкіх супольнасцяў Магілёўшчыны. Іерарх падкрэсліў, што для яго важна бачыць, у якіх умовах жывуць і служаць святары, а таксама ў якіх святынях моляцца вернікі.
Першым месцам, якое наведаў Апостальскі нунцый, стаў Шклоў — парафія святых апосталаў Пятра і Паўла, дзе служыць пробашчам ксёндз Павел Сідарэнка. Святар распавёў высокаму госцю пра багатую гісторыю шклоўскага рэгіёна і пра адраджэнне парафіі, якая ў свой час у літаральным сэнсе адбудавала касцёл з руін.
Асаблівую ўвагу арцыбіскуп Чэффаліа звярнуў на алтар памяці ахвяр Вялікай Айчыннай вайны, якую асвяціў Мітрапаліт Юзаф Станеўскі, і памятную табліцу, якая была ўсталявана з благаслаўлення біскупа Аляксандра Яшэўскага. Алтар прысвечаны ўсім, хто аддаў сваё жыццё за шклоўскую зямлю — не толькі салдатам, але і мірным жыхарам. Святыня стала месцам, дзе памяць пра іх жыве і перадаецца наступным пакаленням.
Ксёндз Павел таксама адзначыў плённае супрацоўніцтва парафіі з мясцовымі органамі ўлады. Гэта, як зазначыў ён, спрыяе захаванню культурнай і духоўнай спадчыны рэгіёна.
Другім пунктам візіту стала парафія ў Горках, дзе служыць Магілёўскі дэкан ксёндз Андрэй Кеўліч. Візіт адбыўся ў асабліва сімвалічны момант: перад прыездам іерархаў у касцёле была запланавана вігілійная святая Імша з нагоды ўрачыстасці Унебаўзяцця Найсвяцейшай Панны Марыі.
Арцыбіскуп Чэффаліа, Мітрапаліт Юзаф і біскуп Аляксандр далучыліся да парафіяльнай Эўхарыстыі. Імшу ўзначаліў Мітрапаліт Юзаф, а казанне прамовіў біскуп Аляксандр. На завяршэнне Апостальскі нунцый звярнуўся да вернікаў са словамі падтрымкі і благаслаўлення ад Папы Льва XIV, падкрэсліўшы, што маленькія парафіі, якія жывуць верай і захоўваюць яе, з’яўляюцца сапраўднымі пярлінамі Касцёла.
Нунцый адзначыў:
«Важная не колькасць, а якасць веры, жыццё паводле Евангелля і здольнасць супольнасці падтрымліваць адзін аднаго на духоўным шляху».
Пасля Імшы ксёндз Андрэй Кеўліч разам з вернікамі выказалі шчырую падзяку Апостальскаму нунцыю за яго візіт, за ўвагу да маленькіх супольнасцяў і за словы падтрымкі.
У знак павагі і падзякі яны падарылі арцыбіскупу памятку пра касцёл, зробленую самім пробашчам — невялікі, але вельмі кранальны знак любові і ўдзячнасці, які адлюстроўвае духоўную цеплыню і адданасць парафіі.
Мітрапаліт Юзаф Станеўскі асабліва падкрэсліў служэнне ксяндза Андрэя Кеўліча, які як дэкан і пробашч адразу трох парафій — у Горках, Чавусах і Мсціславе — нясе пастырскую апеку на тэрыторыі, якая калісьці ўваходзіла ў склад найбуйнейшай у свеце Магілёўскай мітраполіі.
Кожныя выходныя і святы святар праязджае больш за 220 кіламетраў, каб дасягнуць усіх супольнасцяў і забяспечыць іх духоўнае жыццё. Гэта служэнне было адзначана як прыклад сапраўднай пастырскай адданасці і любові да вернікаў.
