2 красавіка, у Вялікі чацвер, святары Пінскай дыяцэзіі з Гомельскай вобласці, сабраліся ў касцёле Нараджэння Найсвяцейшай Панны Марыі ў Гомелі. Галоўнай мэтай іх сустрэчы стала сумесная цэлебрацыя ўрачыстай святой Імшы Хрызмы, якую ўзначаліў дапаможны біскуп Пінскай дыяцэзіі Андрэй Зноска.
Падчас Эўхарыстыі адбылося аднаўленне святарскіх абяцанняў — важны момант, які падкрэслівае вернасць святароў свайму пакліканню і гатоўнасць працягваць служэнне. Акрамя таго, падчас набажэнства быў урачыста благаслаўлены алей хворых, які пазней будзе выкарыстоўвацца для намашчэння вернікаў, якія сутыкнуліся з хваробамі. Таксама быў касэкраваныы алей хрызма — асаблівы алей, які знаходзіць сваё прымяненне ў найважнейшых сакрамэнтах, такіх як хрост, канфірмацыя, святарскае пасвячэнне і пры кансэкрацыі новага алтара.
