Каталіцкі Касцёл у Беларусі ў кастрычніку ўдзельнічае ў арганізацыі і правядзенні мерапрыемстваў, прысвечаных Тыдню бацькоўскай любові. Так называецца перыяд, які пачынаецца 14 кастрычніка (у Беларусі з 1996 года ў гэты дзень адзначаецца Дзень маці) і заканчваецца 21 кастрычніка (Днём бацькі).
Ва ўсіх парафіях Беларусі
- 19 кастрычніка падчас кожнай святой Імшы абвяшчаецца Пастырскі ліст Рады па справах сям'і пры Канферэнцый Каталіцкіх Біскупаў Беларусі «Аб шанаванні бацькоў, аб іх заданні і пакліканні».
- Падчас кожнай святой Імшы на працягу тыдня ў малітве вернікаў прамаўляецца заклік за жывых і спачылых бацькоў.
- Месяц кастрычнік праходзіць па дэвізам «Малітва за бацькоў на Ружанцы». На працягу Тыдня бацькоўскай любові малітва Ружанца ахвяруецца за бацькоў.
- 19 кастрычніка пасля кожнай святой Імшы моладзь і дзеці, якія ўдзельнічаюць у катэхезе, павіншуюць сваіх бацькоў вершамі або песнямі, у залежнасці ад мясцовых магчымасцей, са святам і падораць сваім мамам кветкі.
- Адбудуцца тэматычныя лекцыі для ўдзельнікаў катэхез на тэму «Пакліканне быць бацькамі».
Мінска-Магілёўская архідыяцэзія
1. На базе Хрысціянскага сацыяльнага цэнтра (г. Мінск, вул. Серафімовіча, 19)
- 14 кастрычніка пройдзе мерапрыемства, прысвечанае Дню маці. Мерапрыемства мае адкрыты характар для ўсіх ахвотных. Запрашаюцца не толькі мамы, але таты, іншыя сваякі, а таксама сябры і знаёмыя. Праграма Дня ўключае ў сябе слова святара; кароткую малітву за жывых маці і за тых, якія ўжо адышлі ў вечнасць; падрыхтаваны дзецьмі спецыяльны канцэрт; забаўляльную праграму з удзелам артыстаў і пачастунак.
2. Caritas Мінска-Магілёўскай архідыяцэзіі
- 14 кастрычніка для ўсіх мам з анкахворымі дзецьмі ў Дзіцячым цэнтры св. Лукі (Мінскі р-н, в. Ляскоўка, вул. Карытас, 1) пройдзе майстар-клас з удзелам дзяцей па стварэнні віншавальных паштовак і іншых вырабаў для бацькоў.
- Таксама 14 кастрычніка па ўзгадненні з кіраўніцтвам РНПЦ дзіцячай анкалогіі, гематалогіі і імуналогіі (Мінскі р-н, в. Бараўляны, вул. Фрунзенская, 43) адбудзецца віншаванне непасрэдна ў клініцы маці, якія будуць знаходзіцца на лячэнні ў аддзяленні дзённага знаходжання.
3. Архікатэдральны касцёл (г. Мінск, пл. Свабоды, 9)
- 19 кастрычніка пройдзе забаўляльная праграма для бацькоў, падрыхтаваная пры ўдзеле дзяцей.
- Таксама 19 кастрычніка пасля Імшы ў 13.00 пройдзе канцэрт арганнай музыкі «3 любоўю да бацькоў», прымеркаваны да Тыдня бацькоўскай любові.
4. Касцёл Унебаўзяцця Найсвяцейшай Панны Марыі і святога Станіслава (г. Магілёў, вул. Камсамольская, 4)
- 26 кастрычніка ў 16.00 адбудзецца канцэрт з удзелам дзіцячых хораў з Расійскай Федэрацыі з нагоды Дня маці і Дня бацькі.
Гродзенская дыяцэзія
1. Катэдральная базыліка св. Францішка Ксавэрыя
- 19 кастрычніка ў 11.30 пройдзе канцэрт для бацькоў «Ад сэрца да сэрца» ў выкананні дзяцей, якія ўдзельнічаюць у катэхізацыі пры парафіі.
2. Caritas Гродзенскай дыяцэзіі
Дыяцэзіяльны Дом міласэрнасці (г. Гродна, вул. К. Маркса, 27)
- 16 кастрычніка будзе створана інтэрактыўная пляцоўка «Дзень клопату пра "асаблівыя" мамы» (г. зн. маці, якія выхоўваюць дзяцей з асаблівасцямі).
- Таксама 16 кастрычніка пройдзе тэматычны трэнінг-фотасесія з кавай-гарбатай і падарункамі.
- 21 і 22 кастрычніка адбудзецца індывідуальная кансультацыя з бацькамі «Гутарка па душах: дапамога ў крызісных сітуацыях».
- 23 кастрычніка пройдзе сустрэча з псіхолагам, а таксама майстар-класы з кавай-гарбатай і падарункамі.
Рэкалекцыйны дом Caritas Гродзенскай дыяцэзіі (Гродзенскі р-н, г. п. Сапоцкін, вул. Тэалінская, 39)
- 23 кастрычніка пройдзе адкрытая гасцёўня «Сям'я з Карытас».
Пінская дыяцэзія
Caritas Пінскай дыяцэзіі
- Пройдзе акцыя дапамогі маламаёмасным сем'ям «Дапамога дзецям да аднаго года».
Арганізатары запрашаюць да актыўнага ўдзелу ў мерапрыемствах бацькоў і іх дзяцей.
