Афіцыйныя прадстаўнікі Касцёла ў Беларусі дзень перад пахаваннем Папы Францішка прысвяцілі малітве.
25 красавіка беларуская дэлегацыя духоўных асобаў, у якую, нагадаем, уваходзяць арцыбіскуп Юзаф Станеўскі, Мітрапаліт Мінска-Магілёўскі, Старшыня Канферэнцыі Каталіцкіх Біскупаў у Беларусі, біскуп Аляксандр Яшэўскі SDB, Генеральны вікарый Мінска-Магілёўскай архідыяцэзіі, і ксёндз канонік Юрый Ясевіч, сакратар Мітрапаліта Мінска-Магілёўскага, прысвяціла сёлетнюю пятніцу ў актаве Вялікадня, каб асабіста «прывітацца» з Папам і памаліцца за яго.
Спачатку прадстаўнікам з Беларусі трэба было адстаяць вялікую чаргу, каб дайсці да труны спачылага пераемніка святога Пятра, якая знаходзілася ў Базыліцы Святога Пятра ў Ватыкане.
Урэшце для кожнага з дэлегатаў наступіў момант чарговай і апошняй на гэтай зямлі «сустрэчы» з Папам: духоўнай — праз малітву ў таямніцы еднасці святых, і фізічнай — праз прысутнасць каля яго цела.
Адышоўшы ад труны спачылага Папы крыху далей, іерархі і святар памаліліся за яго пры саркафагах духоўна блізкіх для беларусаў святых: Яна Паўла ІІ і Язафата Кунцэвіча, — зямныя астанкі якіх спачываюць у ватыканскай базыліцы.
Затым разам з біскупам Гуалцьера Сігізмондзі, які працуе ў Ватыкане, беларускія духоўныя асобы там жа, у Базыліцы Святога Пятра, якая з'яўляецца найвялікшай па памерах святыняй ў свеце, цэлебравалі святую Імшу аб жыцці вечным для Папы Францішка.
