16 снежня свой 50-гадовы юбілей адзначае сястра Часлава Навіцкая з Кангрэгацыі Сясцёр Уршулянак Сэрца Езуса Канаючага.
У Касцёле на Беларусі сястра Часлава Навіцкая USJK — калі не самая вядомая, дык, без сумневаў, адна з самых вядомых законных сясцёр.
Заснавальніца і дырэктар Дабрачыннай Мiсiі Добрага Самаранiна пад апекай святой Уршулi Ледухоўскай, яна стварыла ў Мінску Хрысціянскі сацыяльны цэнтр, адбудавала для яго аварыйны будынак былой школы і з мая 2018 года паспяхова кіруе яго разнастайнай дзейнасцю. Выхаванне дзяцей і іх гарманічнае развіццё на хрысціянскіх каштоўнасцях, дапамога патрабуючым і інвалідам, шматлікія духоўныя, культурныя і адукацыйныя праекты — усё гэта ажыццяўляецца пад кіраўніцтвам і з непасрэдным удзелам маленькай уршулянкі з вялікім сэрцам.
Працягваючы справу заснавальніцы сваёй манаскай супольнасці, святой Уршулі Ледухоўскай, сястра Часлава нястомна і рупліва працуе, ніколі не ведаючы адпачынку.
Год таму Мітрапаліт Мінска-Магілёўскі арцыбіскуп Юзаф Станеўскі даў сястры Чаславе Навіцкай яшчэ адно адказнае заданне ў Касцёле, прызначыўшы яе адказнай за душпастырства дзяцей у Мінска-Магілёўскай архідыяцэзіі.
Віншаванне з юбілеем ад Catholic.by сястры Чаславе кіруе дырэктар парталу ксёндз доктар Аляксандр Улас, выказваючы ёй шчырае пажаданне нястомнай дапамогі Маці Божай на кожны дзень жыцця і служэння на хвалу Богу, дзеля збаўлення душаў і на духоўную карысць усім, каго сястра Часлава так шчодра адорвае любоўю свайго вялікага сэрца.
