30 лістапада ў парафіі Адведзінаў Найсвяцейшай Панны Марыі ў мястэчку Вішнева (Мінска-Магілёўская архідыяцэзія, Валожынскі дэканат) адбыліся юбілейныя ўрачыстасці з нагоды 600-годдзя мясцовай парафіяльнай супольнасці.
У гэты дзень, калі Касцёл адзначаў свята святога апостала Андрэя, урачыстую цэлебрацыю святой Імшы ў вішнеўскім касцёле ўзначаліў Мітрапаліт Мінска-Магілёўскі арцыбіскуп Юзаф Станеўскі.
Перад уваходам у старадаўнюю вішнеўскую святыню іерарха шчыра прывіталі хлебам-соллю тутэйшыя вернікі на чале са сваім пробашчам, ксяндзом Юзафам Мельдзюкам.
Першы касцёл, заснаваны у Вішневе ў 1424 годзе вялікім князем Вітаўтам, быў пабудаваны з дрэва на маляўнічым высокім пагорку над ракою Альшанкаю.
Пазней, у першай палове XVII стагоддзя, на яго месцы была пабудавана мураваная святыня па фундацыі ваяводы наваградскага Юрыя Літавора Храптовіча. Пасля смерці фундатар быў пахаваны ў крыпце правай капліцы, размешчанай акурат на месцы драўлянага касцёла часоў Вітаўта.
Мураваны касцёл быў пасвячаны ў 1675 годзе біскупам суфраганам Віленскім Мікалаем Слупскім у гонар Адведзінаў Найсвяцейшай Панны Марыі.
Вішнеўская парафія славутая тым, што ўёй з 1953 года рэгулярна адбываюцца набажэнствы на беларускай мове.
Менавіта тут доўгія гады нёс служэнне легендарны святар, вялікі пядзвіжнік ксёндз Уладзіслаў Чарняўскі, які распачаў пераклады на беларускую мову Святога Пісання і адноўленых Другім Ватыканскім Саборам літургічных тэкстаў святой Імшы.
Ва ўрачыстым святкаванні 600-гадовага юбілею вішнеўскай парафіі ўзялі ўдзел ксяндзы салезіяне на чале з рэгіянальным настаяцелем салезіянскага таварыства ў Беларусі ксяндзом Паўлам Шчарбіцкім SDB, а таксама госці з розных мясцін, многія з якіх паходзяць з Вішнева, так, як пробашч парафіі святога Арханёла Міхала ў Смаргоні ксёндз Артур Ляшнеўскі SDB.
Арцыбіскуп Юзаф Станеўскі павіншаваў пробашча парафіі і ўсіх вернікаў з вялікім гістарычным юбілеем, а пасля Імшы паразмаўляў з прысутнымі на ўрачыстасці дзецьмі і прадстаўнікамі старэйшага пакалення вішнеўскай парафіі, якія добра памятаюць ксяндза Чарняўскага.
