Супрацоўнікі і валанцёры дабрачыннага каталіцкае таварыства Caritas Мінска-Магілёўскай архідыяцэзіі 23 лістапада правялі майстар-класы для дзяцей у Гарадзейскай школе-інтэрнаце.
Такія паездкі ў школы-інтэрнаты да дзяцей — гэта стварэнне асяроддзя, якое спрыяе іх гарманічнаму развіццю і паспяховай інтэграцыі ў грамадства.
Менавіта з гэтай мэтай Caritas рэгулярна арганізуе паездкі ў Гарадзейскую і Бялыніцкую школы-інтэрнаты.
Як паведамляецца на старонцы Caritas Мінск у сацыяльнай сетцы Вк, у суботу супрацоўнікі і валанцёры дабрачыннага таварыства правялі ў Гарадзеі шэраг навучальных майстар-класаў, скіраваных на развіццё розных навыкаў. Майстар-клас па стрэтчынгу дапамог дзецям палепшыць фізічны стан і развіць каардынацыю і пластычнасць.
Заняткі па вырабах з коркаў і пластыліну раскрылі творчы патэнцыял дзяцей, навучылі іх працаваць з рознымі матэрыяламі і ствараць арыгінальныя рэчы сваімі рукамі.
Асаблівай жа папулярнасцю неадменна карыстаюцца кулінарныя майстар-класы.
Падчас занятку дзеці вучыліся новым спосабам гатавання, а потым з задавальненнем каштавалі свае ж кулінарныя шэдэўры на смак.
Гэтым разам прадстаўнікі Caritas зноў прывезлі з сабою перасоўную гульнявую пляцоўку «Рух у радасць», якая стала сапраўдным цэнтрам прыцягнення.
Разнастайнасць інклюзіўных гульняў дазволіла кожнаму дзіцяці знайсці штосьці да душы, незалежна ад ягоных фізічных магчымасцяў ці індывідуальных прыхільнасцяў.
