Увечары ў суботу 9 кастрычніка беларусы каталіцкага вервызнання Масквы (Расія) сустрэліся ў маскоўскім францішканскім кляштары Меншых Братоў Канвентуальных на набажэнстве ў памяць айца Пятра Карнелюка OFMConv, які заўчасна пайшоў у Дом Нябеснага Айца.
Апошнія гады айцец Пётр быў душпастырам беларусаў-католікаў, якія жывуць у Маскве і сталічным рэгіёне суседняй дзяржавы, а таксама і для беларусаў, якія наведвалі гэты горад і жадалі ўдзельнічаць у набажэнствах па-беларуску.
Святую Імшу ў вігілію ХХХІІ звычайнай нядзелі ў інтэнцыі спачалага святара цэлебраваў на беларускай мове протаархімандрыт айцец Пэтрос Есаян MIC, пробашч армяна-каталіцкай парафіі святога Рыгора Асветніка.
У гаміліі айцец Пэтрос асабліва падкрэсліў неабходнасць давяраць Пану, пра што ішла гаворка ў літургічным першым чытанні: «Не бойся, але ідзі і зрабі…» (гл. 1 Вал 17, 10–16).
«Так і мы ў штодзённым жыцці не павінны баяцца аддаць сябе цалкам Хрысту. Не дзеля таго, каб атрымаць нейкія даброты ці выгоды, але ласку Божую і жыццё вечнае», — заахвоціў удзельнікаў святой Імшы айцец Пэтрос.
Пасля Эўхарыстыі адбылася душпастырская сустрэча ў францішканскім цэнтры, на якой некалькі дзясяткаў вернікаў падзяліліся сваімі ўспамінамі пра спачылага айца Пятра Карнелюка.
Айцец Пэтрос запэўніў, што ў памяць аб айцы Пятра — сваім браце ў святарстве і вельмі добрым сябры па жыцці — не пакіне асірацелую супольнасьць беларусаў-католікаў і будзе праводзіць для іх набажэнствы на роднай мове.
Айцец Пэтрос Есаян МІС з 10-гадовага ўзросту і да навіцыяту ў законніцкай супольнасці марыянаў жыў у Беларусі. Добра валодае некалькімі мовамі, у тым ліку беларускай. Яго прыміцыя ў армянскім абрадзе адбылася ў роднай парафіі ў Барысаве, дзе нясуць служэнне ксяндзы марыяне.
Той факт, што айцец Пэтрос адгукнуўся на просьбу вернікаў-беларусаў цэлебраваць гэтую Імшу, а пасля сам прыняў рашэнне працягнуць справу айца Пятра Карнелюка, яшчэ раз сведчыць аб неабходнасці цалкам давяраць Богу, які ніколі не пакідае сваіх дзяцей.
