30 верасня, калі Папа Францішак прыняў адмову ад пасады дыяцэзіяльнага біскупа Гродзенскай дыяцэзіі Аляксандра Кашкевіча, Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі, кіруе заслужанаму іерарху словы падзякі за плённае пастырскае служэнне.
Ваша Эксцэленцыя, паважаны біскуп Аляксандр,
Паведамленне Апостальскай Нунцыятуры ў Беларусі з інфармацыяй аб тым, што Святы Айцец Папа Францішак прыняў Вашу адмову ад пасады Дыяцэзіяльнага біскупа Гродзенскай дыяцэзіі ў сувязі з дасягненнем 75-гадовага ўзросту, згодна з нормамі Кананічнага права (гл. кан. 401–402) азначае, што першы Гродзенскі біскуп становіцца першым Гродзенскім біскупам эмэрытам.
Ваша Эксцэленцыя, быць першым заўсёды нялёгка і няпроста, таму ад свайго імя і ад імя Канферэнцыі Каталіцкіх Біскупаў у Беларусі хачу падзякаваць Вам за шматгадовую працу, звязаную з пастырскай паслугай першага біскупа Гродзенскай дыяцэзіі.
Калі Папа Ян Павел ІІ у буле Qui operam ад 13 красавіка 1991 года заснаваў новую дыяцэзію на Беларусі, было відавочна, што яе першым біскупам павінен быць чалавек глыбокай веры, палкага сэрца, невычэрпнай сілы і з душпастырскім бачаннем, дзякуючы якім з парафій, якія раней адміністрацыйна належалі да некалькіх дыяцэзій — Віленскай архідыяцэзіі, Пінскай дыяцэзіі і Ломжынскай дыяцэзіі, — можна будзе стварыць адзіную і інтэграваную супольнасць. Біскуп пачаў ствараць дыяцэзіяльныя структуры: заснаваў курыю, заснаваў дыяцэзіяльны Caritas, а таксама заснаваў святарскую раду, калегію дарадцаў, душпастырскую раду, катэдральны Капітул і іншыя ўстановы.
Клопатам Вашай Эксцэленцыі на працягу 33-х гадоў біскупскага служэння была Вышэйшая Духоўная Семінарыя ў Гродне, якая за гэтыя гады падрыхтавала да святарства больш за 200 святароў. Вы таксама разумелі патрэбу паглыблення тэалагічных ведаў свецкімі асобамі, таму заснавалі ў Гродне Тэалагічны каледж імя святога Казіміра.
Сёння, згодна са статыстычнымі дадзенымі за 2021 год, Гродзенская дыяцэзія налічвае 275 тыс. 550 вернікаў, якія належаць да 161 парафіі, 134 дыяцэзіяльных святары і 46 святароў манаскіх кангрэгацый і ордэнаў, каля 124 манаскіх сясцёр і манахаў братоў.
Немагчыма пералічыць іншыя справы і дасягненні, якія Вы як біскуп здзейснілі ў дыяцэзіі падчас свайго пастырскага служэння.
Вось толькі некаторыя з іх: распачаў працу першы дыяцэзіяльны сінод, з’явіліся будынак курыі, Дом міласэрнаці ў Сапоцкіне, адбылася рэстаўрацыя будынку Пабрыгіцкага кляштара ў Гродне, былі пабудаваныя дзясяткі новых святыняў.
Ваша Эксцэленцыя, у якасці біскупскага дэвізу Вы абралі словы Іesu in Te сonfido — «Езу, давяраю Табе» — словы, якія святая Фаўстына Кавальская падаравала свету падчас аб’яўленняў ёй Міласэрнага Езуса ў Вільні. Сёння дзякуем за ваш давер і сардэчнасць як пастыра і чалавека. Жадаем, каб і надалей Вы вялі актыўны дыялог з Панам, які няспынна яго з намі падтрымлівае.
Няхай наступныя гады вашага жыцця будуць пад чулай апекай Маці Божай Вастрабрамскай, а святы Аляксандр няхай дапамагае Вам у пераадоленні ўсіх цяжкасцяў.
З пашанай, Ваш брат у пастырскім служэнні
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў у Беларусі
