23 верасня свой 75-гадовы юбілей адзначае біскуп Гродзенскі Аляксандр Кашкевіч — першы пастыр створанай святым Янам Паўлам ІІ у красавіку 1991 года Гродзенскай дыяцэзіі.
Аляксандр Кашкевіч нарадзіўся 23 верасня 1949 года ў вёсцы Падгайдзі, што на тэрыторыі Эйшышскай парафіі Віленскай архідыяцэзіі.
Скончыў Вышэйшую духоўную семінарыю ў Каўнасе, пасля чаго 30 мая 1976 года прыняў сакрамэнт пасвячэння ў ступені прэзбітэрату.
З 1976 па 1981 год малады святар нёс служэнне вікарыя ў парафіі ў Панявежысе. У 1981 годзе быў прызначаны пробашчам парафіі Святога Духа ў Вільні.
13 красавіка 1991 года тагачасны Папа святы Ян Павел ІІ прызначыў віленскага ксяндза Аляксандра Кашкевіча біскупам новастворанай Гродзенскай дыяцэзіі.
Яго біскупскае пасвячэнне адбылося 23 мая 1991 года ў Гродне. Галоўным пасвячаючым біскупам быў арцыбіскуп Тадэвуш Кандрусевіч.
З 14 чэрвеня 2006 па 3 чэрвеня 2015 з’яўляўся Старшынёй Канферэнцыі Каталіцкіх Біскупаў у Беларусі.
У беларускім каталіцкім епіскапаце ўзначальвае Раду па справах міграцыі, турызму і пілігрымак.
Дырэктар парталу Catholic.by ксёндз доктар Аляксандр Улас ад імя рэдакцыі выказвае біскупу Аляксандру Кашкевічу шчырыя віншаванні з нагоды юбілею і кіруе сардэчныя пажаданні шчодрых Божых ласкаў, здароўя, духоўных і фізічных сілаў на далейшым шляху жыцця і пастырскага служэння на доўгія і святыя гады.
