23–25 жніўня ў Навагрудку (Гродзенская дыяцэзія) адбыўся агульнабеларускі малітоўны семінар служыцеляў евангелізацыйнага Альфа-курса.
У семінары, які праходзіў пры навагрудскай парафіі святога Арханёла Міхала, бралі ўдзел служыцелі з чатырох супольнасцяў: з рэктаральнага касцёла Звеставання Найсвяцейшай Панне Марыі ў Гродне (Пабрыгідскага), з гродзенскай парафіі Найсвяцейшага Адкупіцеля, з парафіі Найсвяцейшай Тройцы (святога Роха) на Залатой Горцы ў Мінску, а таксама з парафіі, у якой ладзілася мерапрыемства.
Асноўнай мэтай семінара была супольная малітва за справу новай евангелізацыі ў Беларусі, а таксама дзяленне досведам правядзення сустрэч Альфа-курса.
У прагараме лекцый былі асветленыя тэмы, якія датычыліся асноўнай місіі Альфа-курса пры парафіях. Гаворка ішла пра гасціннасць і культуру запрашэння ў адносінах да слухачоў, закраналіся таксама пытанні, звязаныя з падрыхтоўкай новых служыцеляў. Разам з удзельнікамі малітоўнага семінара прысутнічалі іх душпастыры: ксёндз канонік Антоній Грэмза і ксёндз Дзмітрый Лабкоў CSsR з Гродна, ксёндз канонік Юрый Санько з Мінска, ксёндз Юрый Жэгарын з Навагрудка.
Служыцелі Альфа-курса выказалі надзею, што справа новай евангелізацыі праз гэты евангелізацыйны курс будзе пашырацца, ахопліваць новыя парафіі і прыносіць багаты плён у жыцці людзей, якія шчырым сэрцам хочуць пазнаць Бога і Яму служыць.
