10 жніўня, падчас цэнтральнай урачыстай святой Імшы сёлетняга фэсту ў гонар Маці Божай Лагішынскай, Каралевы Палесся, да ўдзельнікаў звярнуўся новаменаваны дапаможны біскуп Пінскай дыяцэзіі ксёндз канонік Андрэй Зноска.
Прамовіўшы да шматлікіх вернікаў, сабраных з розных куткоў самай вялікай па плошчы дыяцэзіі ў Беларусі, біскуп намінат папрасіў іх аб малітоўнай падтрымцы яго будучага пастырскага служэння, якое распачнецца ўжо менш як праз месяц.
Ксёндз Зноска паведаміў, што яго біскупскае пасвячэнне запланавана на 7 верасня.
Падчас святой Імшы, якая распачнецца ў гэты дзень а 16-й гадзіне ў пінскай катэдральнай базыліцы Унебаўзяцця Найсвяцейшай Панны Марыі, ён прыме сакрамэнт пасвячэння ў ступені епіскапату.
Карыстаючыся нагодаю, біскуп намінат Андрэй Зноска запрасіў усіх да ўдзелу ва ўрачыстасці біскупскага пасвячэння, якое стане ўжо чацвёртым у гісторыі пінскай катэдры.
Упершыню ў старадаўняй святыні пасвячэнне епіскапату адбылося 15 жніўня 1933 года. Яго ўдзяліў тагачасны біскуп Пінскі Казімір Букраба свайму дапаможнаму біскупу Каралю Няміру. Наступным стала біскупскае пасвячэнне Казіміра Свёнтка, якое ў пінскай катэдры ўдзяліў яму першы ў пасляваеннай гісторыі Беларусі біскуп Тадэвуш Кандрусевіч.
Апошняе да гэтага часу біскупскае пасвячэнне ў катэдральнай базыліцы ў Пінску адбылося ўжо чвэрць стагоддзя таму, 24 чэрвеня 1999 года.
У гэты дзень тагачасны арцыбіскуп Мітрапаліт Мінска-Магілёўскі і Апостальскі адміністратар Пінскай дыяцэзіі кардынал Казімір Свёнтэк удзяліў пасвячэнне епіскапату дапаможнаму біскупу Казіміру Велікасельцу.
