8 жніўня ў аграгарадку Хоўхлава (Мінска-Магілёўская архідыяцэзія, Маладзечанскі дэканат) распачалася акцыя па аднаўленні драўлянага касцёла Найсвяцейшага Імя Марыі.
За амаль тры стагоддзі свайго існавання пабудаваная з дрэва святыня была сведкам розных падзей, перажывала перыяды страт і адраджэння, прыходзіла ў заняпад і ўздымалася, напаўнялася людзьмі і пусцела, нават пабыла праваслаўнай царквой у часы Расійскай імперыі і калгасным складам у савецкія часы, але ніколі не была пазбаўлена шчырых вернікаў, якія, як маглі, клапаціліся пра яе стан. І хоць цяпер гэты касцёл і парафія перажываюць складаныя часы, калі большасць моладзі выехала ў гарады і засталася толькі невялікая рэшта мясцовых вернікаў, святыня жыве.
Па запрашэнні меншых братоў капуцынаў, якія нясуць служэнне ў парафіі святога Казіміра ў Маладзечне, а таксама апякуюцца хоўхлаўскімі вернікамі, з 9 па 10 жніўня ў Хоўхлаве праходзіць акцыя па аднаўленні касцёла.
Валанцёры, сярод якіх неабыякавыя людзі з Маладзечна, Мінска і іншых мясцін, а таксама калектыў «Радыё Марыя Беларусь» парадкуюць тэрыторыю і фарбуюць драўляныя сцены старадаўняй святыні.
Акцыя распачалася раніцай 8 жніўня святой Імшой ў хоўхлаўскім касцёле.
9 жніўня ўсіх зацікаўленых чакае «экскурс у мінулае», з якога можна будзе даведацца пра Хоўхлава, мясцовы касцёл і выбітных людзей, звязаных з мястэчкам. Пачатак экскурсіі ў 20.00.
Арганізатары запрашаюць усіх ахвотных прыняць удзел у акцыі. Далучыцца можна духоўна, фізічна і матэрыяльна.
