З 28 ліпеня па 3 жніўня ў рэкалекцыйным доме «Голас Айца» ў Росі (Гродзенская дыяцэзія, Ваўкавыскі дэканат) праходзіла чарговая, шостая серыя рэкалекцый для кансэкраваных асобаў з розных кангрэгацый.
Гэтыя духоўныя практыкаванні былі арганізаваныя Каардынацыйнай групай вышэйшых настаяцеляў, дэлегатаў і прадстаўнікоў мужчынскіх і жаночых манаскіх інстытутаў i таварыстваў апостальскага жыцця ў Беларусі.
У рэкалекцыях узялі ўдзел 25 кансэкраваных асобаў з 14-і мужчынскіх і жаночых манаскіх кангрэгацый, якія служаць ва ўсіх дыяцэзіях Беларусі.
Духоўныя практыкаванні правёў ксёндз Алег Грыгаровіч SAC. Падчас прапанаваных ім аскетычных канферэнцый удзельнікі разважалі над тэмамі веры і паклікання, сувязі паміж Эўхарыстыяй і любоўю, міласэрнасці і духоўнасці ахвярвання, слухання Божага Слова і таго, як быць шчаслівым ў манаскім пакліканні.
Рэкалекцыі адбываліся ў цішыні — sacrum silentium, — што ў літаральным перакладзе з лаціны азначае «святое маўчанне». Духоўныя практыкаванні ўключалі штодзённую Эўхарыстыю, канферэнцыі, адарацыі Найсвяцейшага Сакрамэнту, Літургію гадзінаў, асабістыя медытацыі.
Важным момантам рэкалекцый была малітва перад фігурай Езуса Журботнага ў дыяцэзіяльным санктурыі ў Росі.
У гэты час духоўнага засяроджання кансэкраваныя асобы аб’ядналіся ў малітве ў супольнай інтэнцыі за мір у свеце, а таксама аб ласках для святога Касцёла і манаскага жыцця ў Беларусі.
