19 ліпеня Святы Айцец Папа Францішак прызначыў ксяндза каноніка Андрэя Зноску з Ліды дапаможным біскупам Пінскай дыяцэзіі.
Функцыі дапаможнага біскупа акрэслены кананічным правам.
Так, у каноне 403 гаворыцца, што калі да гэтага схіляюць пастырскія патрэбы дыяцэзіі, па просьбе дыяцэзіяльнага біскупа можа быць прызначаны адзін або некалькі дапаможных біскупаў, прычым дапаможны біскуп не мае права наступства, у адрозненне ад біскупа каад’ютара, надзеленага спецыяльнымі паўнамоцтвамі і з правам наступства, якім у Беларусі з’яўляецца біскуп Уладзімір Гуляй.
Біскуп-каад’ютар і дапаможны біскуп дапамагаюць дыяцэзіяльнаму біскупу ва ўсім кіраванні дыяцэзіяй, а таксама замяшчаюць яго падчас адсутнасці або пры наяўнасці перашкодаў (пар. канон 405).
Дыяцэзіяльнаму біскупу пры разглядзе найбольш важных пытанняў, асабліва пастырскага характару, кананічнае права наказвае раіцца найперш з дапаможнымі біскупамі (пар. канон 407).
Біскупы, якім не даручана апека над дыяцэзіяй (пар. канон 376), напрыклад Апостальскія нунцыі і дапаможныя біскупы, называюцца тытулярнымі біскупамі. Таму ім у дадатак да пэўнага служэння надаецца тытул біскупа гістарычных месцаў.
Такім чынам, біскуп намінат Андрэй Зноска атрымаў тытулярную катэдру Скардоны — гістарычнай дыяцэзіі на тэрыторыі Харватыі, сучасны Скрадзін.
Былы тытулярны біскуп Скардоны, дапаможны біскуп Манрэаля на пенсіі Жуд Сэнт-Антуан памёр 10 снежня 2023 года. Ён насіў тытул пастыра гістарычнай харвацкай дыяцэзіі больш за сорак гадоў, з моманту свайго прызначэння біскупам 20 сакавіка 1981 года. Да яго тытулярнымі біскупамі Скардоны былі Кандзідо Ларэнцо Гансалес з Бразіліі (5 снежня 1969 г. – 26 мая 1978 г.) і Энтані Майкл Піла з ЗША (30 чэрвеня 1979 г. – 13 лістапада 1980 г.).
У памяць аб ранейшай біскупскай сталіцы скрадзінскія пробашчы пэўны час насілі мітру, хоць і не былі біскупамі.
Скрадзін стаў тытулярнай біскупскай сталіцай у 1933 годзе пад лацінскай назвай Diœcesis Scardonensis.
