25 ліпеня, у Дзень пажарнай службы Беларусі, вікарый парафіі святых апосталаў Пятра і Паўла ў Іўі (Гродзенская дыяцэзія) павіншаваў супрацоўнікаў раённага аддзела па надзвычайных сітуацыях з прафесійным святам.
З нагоды прафесійнага свята пажарных-ратавальнікаў у скверы горада Іўе прайшло ўрачыстае мерапрыемства. У цэнтры горада раённы аддзел па надзвычайных сітуацыях папоўніў свае шэрагі новымі супрацоўнікамі, а таксама былі ўзнагароджаны тыя, хто вызначыўся падчас службы.
Да ратавальнікаў звярнуўся таксама вікарый івейскай парафіі ксёндз Андрэй Каўшук. Святар павіншаваў іх з прафесійным святам і благаславіў на плённую службу.
Варта адзначыць, што калектыў Івейскага РАНС заўсёды запрашае на свае святы святароў, а 4 мая, ва ўспамін свайго апекуна, святога Фларыяна, пажарныя збіраюцца ў касцёле на супольную малітву.
Дзень пажарнай службы Беларусі быў устаноўлены 11 верасня 1998 года. Аддзел пажарнай аховы ў Іўі і пажарная каманда былі створаны ў верасні 1944 года. 11 верасня 1998 года пажарная служба была далучана да сіл Міністэрства па надзвычайных сітуацыях (МНС) Рэспублікі Беларусь.
