Біскуп каад’ютар Гродзенскай дыяцэзіі Уладзімір Гуляй прызначаны генеральным вікарыем дыяцэзіі.
Як паведаміла Прэс-служба Гродзенскай дыяцэзіі, у дзень прызначэння, 6 чэрвеня, у будынку біскупскай курыі ў Гродне прайшло пасяджэнне калегіі кансультантаў Гродзенскай дыяцэзіі.
Пасяджэнне ўзначаліў біскуп Гродзенскі Аляксандр Кашкевіч.
На сустрэчы абмяркоўваліся актуальныя справы паўсюднага Касцёла, Касцёла на Беларусі і на Гродзеншчыне.
Біскуп Уладзімір Гуляй на пасяджэнні прадставіў калегіі кансультантаў дакументы аб сваім прызначэнні каад’ютарам Гродзенскай дыяцэзіі.
Задача Генеральнага вікарыя, якім іерарх стаў цяпер, — дапамагаць біскупу Кашкевічу ў кіраванні ўсёй дыяцэзіяй (пар. ККП 475 §1).
Такім чынам, ксёндз канонік Аляксандр Мацкевіч, які выконваў функцыі генеральнага вікарыя Гродзенскай дыяцэзіі з 7 снежня 2021 года, цяпер вызвалены ад іх выканання.
