У суботу 25 мая ў Копішчы (Новая Баравая) адбылася інтэграцыйная сустрэча на заканчэнне навучальнага года, якая сабрала юнакоў і дзяўчат з парафій Мінска і ваколіц.
Сёлета сустрэча прыпала на дзень апошніх званкоў для 9 і 11 класаў.
Каталіцкую моладзь гасцінна прынялі меншыя браты капуцыны ў парафіі святога Францішка Асізскага.
Супольнасць францішканскай моладзі «Таў» падрыхтавала цікавую гульню: маладыя людзі падзяліліся на каманды і праходзілі «іспыты» на згуртаванасць і спрытнасць, а калі папяхова іх праходзілі, атрымлівалі факты з жыццярыса святога Францішка. Фіналам гульні была праверка таго, як удзельнікі кожнай каманды ведаюць даты, імёны і важныя падзеі з жыцця святога бедняка з Асізі. Пераможцаў чакалі прызы.
Смачныя кілбаскі, клапатліва прыгатаваныя адказным за душпастырства моладзі ў Мінска-Магілёўскай архідыяцэзіі ксяндзом Андрэем Бураком і яго камандай, а таксама прахаладжальныя напоі ўсім былі да смаку.
Цікавыя сустрэчы і новыя знаёмствы чакалі моладзь. Вольны час быў выкарыстаны на прыемныя размовы і пасілак.
Працягнулася сустрэча гульнямі і танцамі, якія разгарачылі прысутных яшчэ больш, чым спякотнае майскае сонейка. Музыка і смех, плясканне ў далоні і тупат ног — вось чым была напоўнена прыкасцёльная тэрыторыя.
І раптам настала звонкая цішыня: моладзь зайшла ў касцёл. Малітва — неад’емная частка кожнай сустрэчы. Напрыканцы маёўкі юнакі і дзяўчаты праслаўлялі Тройцу псальмамі з Нешпараў.
Моладзь дзякавала Богу за мінулы год, за сяброў і душпастыраў, а таксама малілася аб добрым перажыванні падзей, якія чакаюць летам.
Таксама прысутныя павіншавалі ксяндза Андрэя Бурака з мінулым днём нараджэння.
На развітанне дзяліліся ўражаннямі адно з адным і абмяркоўвалі планы новых сустрэч.
