25 мая, падчас урачыстай цэлебрацыі ў катэдральнай базыліцы святога Францішка Ксавэрыя ў Гродне, Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі, ад імя епіскапату скіраваў віншаванні новапасвячанаму біскупу кад’ютару Гродзенскай дыяцэзіі Уладзіміру Гуляю.
Ваша Эксцэленцыя,
найдастойнейшы біскуп Уладзімір Гуляй!
Ад імя Канферэнцыі Каталіцкіх Біскупаў у Беларусі прыміце самыя шчырыя віншаванні з нагоды Вашага біскупскага пасвячэння на біскупа каад’ютара Гродзенскай дыяцэзіі! Разам з тым вітаю Вас у складзе Канферэнцыі Каталіцкіх Біскупаў у Беларусі і спадзяюся на супольную плённую працу.
Ваша Эксцэленцыя! У саборным дэкрэце «Аб пастырскіх заданнях біскупаў у Касцёле» чытаем: «Хрыстус даў Апосталам і іх наступнікам наказ і ўладу навучаць усе народы, асвячаць людзей у праўдзе і быць іх пастырамі», а ў паслясінадальнай Апостальскай адгартацыі Pastores gregis — пра біскупа, слугу Евангелля — чытаем: «Біскуп пасланы ад імя Хрыста як пастыр, каб клапаціцца пра частку даручанага яму народа Божага».
Мяркую, што менавіта гэтыя будучыя біскупскія заданні натхнілі Вас паўтарыць сабе і падзяліцца з людам, даручаным Вашай пастырскай апецы, запэўненне Хрыста, які сказаў тым, хто пойдзе за Ім: Sufficit tibi gratia Mea — «Хопіць табе Маёй ласкі».
Гэтыя словы Вы выбралі як дэвіз Вашага пастырскага служэння: няхай яны натхняюць Ваш сённяшні ўрачысты дзень і будуць натхненнем для Вас і для вернікаў у пераадоленні штодзённых цяжкасцяў.
Жадаю ўсё больш глыбокага перажывання таго, што значыць «быць пасланым», — гэта значыць удзелу ў місіі самога Езуса Хрыста, які ў сваім пастырскім служэнні аб’яўляе любоў Бога да чалавека. Спадзяюся на тое, што штодзённая блізкасць Евангелля і Эўхарыстыі прывядзе да асвячэння Вас і народ Божы, давераны Вашай пастырскай апецы.
Даручаю Вашае жыццё і служэнне біскупа Маці Божай Каралеве Беларусі і дасылаю братэрскае прывітанне ў Хрысце,
✠ Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў у Беларусі
Гродна, 25 мая 2024 г.
