У маі вернікі многіх каталіцкіх парафій Беларусі актыўна пілігрымуюць па краіне і ахвотна дзеляцца ўражаннямі і набытым духоўным досведам з чытачамі Catholic.by.
Так, 13 мая, ва ўспамін Найсвяцейшай Панны Марыі Фацімскай, група вернікаў з парафіі святога Антонія Падуанскага ў Магілёве разам з адным з душпастыраў, ксяндзом Віталіем Чабатаром CMF, наведалі Гродна — горад з даўняй каталіцкай традыцыяй, дзе свой зямны шлях завяршыў святы каралевіч Казімір і пэўны час нёс служэнне святы Максімільян Кольбэ.
Вандроўку-пілігрымку здзейснілі цягніком, які спалучае ўсход і захад нашай краіны.
Наведванне Гродна распачалі з удзелу ў святой Імшы ў катэдральнай базыліцы святога Францішка Ксавэрыя, дзе таксама памаліліся перад цудадзейным абразом Маці Божай Кангрэгацкай, або Студэнцкай.
З катэдры скіраваліся ў пабрыгіцкі касцёл, дзе яго рэктар, ксёндз канонік Антоні Грэмза правёў цікавую экскурсію па ўнікальнай святыні і па сутарэннях пад ёю.
Магілёўцы наведалі і «сэрца» Касцёла ў Беларусі — Міждыяцэзіяльную вышэйшую духоўную семінарыю, дзе ўбачылі, як жывуць і вучацца будучыя святары.
Там пілігрымы з горада над Дняпром памаліліся ў самай старой каталіцкай святыні горада над Нёманам — касцёле Адшукання Святога Крыжа.
Перайшоўшы па мосце праз Нёман, памаліліся ў касцёле айцоў францішканаў, дзе ў міжваенны перыяд нёс служэнне святы Максіміліян Марыя Кольбе, які аддаў жыццё ў Асвенцыме, ратуючы сваёй ахвярай іншага вязня.
Вярнуўшыся ў цэнтр горада, пілігрымы з Магілёва наведалі Стары і Новы замкі, дзе адбываліся значныя падзеі гісторыі роднага краю.
Пабывалі таксама ў гродзенскай сінагозе — адной з найбольшых у Беларусі, і наведалі адну з найстаражытнейшых хрысціянскіх святыняў Бацькаўшчыны — Каложскую царкву, што ўжо амаль тысячу гадоў стаіць на стромым беразе Нёмана.
На заканчэнне вандроўкі-пілігрымкі наведалі яшчэ адну праваслаўную святыню — Пакроўскую царкву.
Поўныя уражанняў, пілігрымы тым самым цягніком вярнуліся дадому, у родны Магілёў.
