6 мая біскуп намінат Уладзімір Гуляй наведаў праваслаўнага архіепіскапа Гродзенскага і Ваўкавыскага Антонія.
Як паведаміла Прэс-служба Гродзенскай дыяцэзіі, сустрэча прайшла ў Гродзенскім епархіяльным упраўленні.
У межах візіту біскуп намінат выказаў архіепіскапу Антонію віншаванні з нагоды ўрачыстасці Пасхі, якую праваслаўныя вернікі адзначалі ў мінулую нядзелю.
Праваслаўны іерарх, у сваю чаргу, павіншаваў наміната з яго прызначэннем каад’ютарам Гродзенскай дыяцэзіі.
Сустрэча прайшла ў цёплай сяброўскай атмасферы. Суразмоўцы выказалі гатоўнасць да далейшага плённага супрацоўніцтва Каталіцкага Касцёла і Праваслаўнай Царквы ў горадзе над Нёманам.
