На юбілей 400-годдзя касцёла святога Арханёла Міхала ў Навагрудку (Гродзенская дыяцэзія) шэраг беларускіх мастакоў падаравалі мясцовай парафіі свае працы.
У 1624 годзе ў Навагрудку быў фундаваны кляштар дамініканаў. Першапачаткова драўляны касцёл пры ім быў пасвячаны ў гонар святога Яцка, заступніка Літоўскай правінцыі Ордэна Прапаведнікаў.
Каля 1724 года на яго месцы дамінікане пабудавалі мураваны касцёл. Тытул святыні змяніўся ў другой палове XVIII стагоддзя, калі касцёл адбудавалі пасля пажару 1751 года. З таго часу святыня была прысвечана ўжо святому Міхалу Арханёлу. Асаблівае ўшанаванне святога Міхала ў Навагрудку пачалося пасля вайны 1654–1667 гадоў, калі, згодна с паданнем, нябесны Пасланец выратаваў горад ад знішчэння.
Падарунак парафіі зрабілі жывапісцы Віктар Сагановіч, Аляксандр Грышкевіч, Павел Татарнікаў, Аляксандр Балдакоў, Сяргей Грыневіч, Васіль Матусевіч, Васіль Чатнеўцаў, Валянціна Шоба і іншыя.
Падараваныя імі творы маюць тры асноўныя тэматычныя кірункі, звязаныя з гісторыяй святыні: святы Дамінік і ордэн дамініканаў, а таксама яго дзейнасць на Навагрудчыне, будынак касцёла Міхала Арханёла, постаць Святога Арханёла Міхала.
Працы мастакоў будуць змешчаныя ў будынку парафіяльнага дома.
