У Велікодны панядзелак 1 красавіка валанцёры суполькі Caritas парафіі святога Казіміра (касцёл святога Піо, Маладзечна, Мінска-Магілёўская архідыяцэзія) занеслі радасць Уваскрослага Хрыста людзям, якія знаходзяцца у псіханеўралагічным доме-інтэрнаце і аддзяленні дзённага знаходжання для інвалідаў і пажылых грамадзян горада Маладзечна.
Святкаванне распачалося з радаснага вокліча «Хрыстос уваскрос! — Сапраўды ўваскрос!», словаў віншавання і супольнай малітвы.
Святочны стол упрыгожвалі фарбаваныя яйкі, булкі, кулічы, пернікі і цукеркі, якімі шчодра падзяліліся вернікі парафіі святога Казіміра. Кожны за супольным сталом мог пагуляць у вясёлую традыцыйную пасхальную гульню «біткі», або «мацаванне» яйкамі, паспяваць песні, проста паразмаўляць.
Пастаяльцы з дома-інтэрната атрымалі ад парафіянаў індывідуальныя падарункі: сродкі гігіены, інтэлектуальныя гульні, канцылярскія тавары, ласункі. Ад Францішканскай моладзі «Таў» кожны атрымаў прыгожую паштоўку са святам Вялікадня, на якой сардэчныя і шчырыя словы віншавання напісалі дзеці разам з сястрой Кацярынай Грынчык MSF.
Святкаванне прайшло ва ўтульнай атмасферы, нібы ў сям’і.
Арганізатары шчыра дзякуюць дабрачынцам і ўсім, хто прычыніўся да святкавання, дзелячыся радасцю і цеплынёй свайго сэрца з патрабуючымі.
