21 сакавіка ў касцёле святога Міхала Арханёла ў Івянцы адбыўся дзень засяроджання для сясцёр розных манаскіх супольнасцяў, якія нясуць служэнне ў Мінска-Магілёўскай архідыяцэзіі.
Удзел у велікапоснай сустрэчы манскіх асобаў узяў Мітрапаліт Мінска-Магілёўскі арцыбіскуп Юзаф Станеўскі.
Дзень засяроджання распачаўся з аскетычнай канферэнцыі на тэму «Клопат і будаванне адносінаў», якую падрыхтаваў старшыня Каардынацыйнай групы вышэйшых настаяцеляў, дэлегатаў і прадстаўнікоў мужчынскіх і жаночых манаскіх інстытутаў і таварыстваў апостальскага жыцця ў Беларусі ксёндз Анджэй Юхневіч OMI. Святар закрануў вельмі важныя аспекты адносінаў: адносіны з Богам, з самім сабой, з бліжнімі і адносіны да місіі.
«Наша місія — гэта дайсці да Неба, быць з Езусам у Небе. Важна памятаць пра гэта, калі выконваеце свае заданні як катэхеткі ці сакрыстыянкі», — падкрэсліў законнік з супольнасці місіянераў аблатаў. Напрыканцы канферэнцыі святар заахвоціў сясцёр глыбей паразважаць над пытаннямі будавання адносінаў, якія падрыхтаваў на асобных картках.
Пасля канферэнцыі сёстры мелі час на адарацыю Найсвяцейшага Сакрамэнту ў капліцы вячыстай адарацыі, а таксама мелі магчымасць прыступіць да сакрамэнту споведзі.
Апоўдні адбылася святая Імша, цэлебрацыю якой узначаліў арцыбіскуп Юзаф Станеўскі, які шчыра прывітаў удзельніц дня засяроджання.
З іерархам Эўхарыстыю канцэлебравалі яго асабісты сакратар ксёндз канонік Юрый Ясевіч, ксёндз Анджэй Юхневіч OMI і францішканін з супольнасці ў Івянцы айцец Павел Раманчук OFMConv. У прамоўленай гаміліі ксёндз Анджэй падкрэсліў, што падобна да таго, як Езус Хрыстус не быў прыняты юдэямі, якія «схапілі камяні, каб кінуць ў Яго» (пар. Ян 8, 59), так і мы не заўсёды будзем прынятыя іншымі людзьмі, калі будзем выконваць сваю місію.
На заканчэнне дня засяроджання адбыўся агульны сход удзельніц, на якім былі абмеркаваныя арганізацыйныя пытанні і далейшыя планы.
Сёстры вельмі ўдзячныя арцыбіскупу Юзафу Станеўскаму, ксяндзу Анджэю Юхневічу OMI, айцу Паўлу Раманчуку OFMConv і ўсім айцам францішканам, а таксама сёстрам назарэтанкам, якія нясуць служэнне ў Івянцы, і ўсёй тутэйшай парафіяльнай супольнасці за арганізацыю дня засяроджання, за адкрытасць і гасціннасць. Удзельніцы спадзяюцца на тое, што гэтая сустрэча прынясе багаты плён як у іх асабістым жыцці, так і ў жыцці іх манаскіх супольнасцяў.
