20 сакавіка ў гродзенскім касцёле Маці Божай Анёльскай (францішканскі) адбылася святая Імша ў інтэнцыі спачылага ксяндза Яна Гавэцкага ў 30-ы дзень пасля яго смерці.
Як паведаміла Прэс-служба Гродзенскай дыяцэзіі, на Эўхарыстыі, цэлебрацыю якой узначаліў біскуп Гродзенскі Аляксандр Кашкевіч, сабраліся святары, сёстры законныя і свецкія вернікі. Да малітвы аб вечным жыцці для спачылага далучыўся Генеральны вікарый Мінска-Магілёўскай архідыяцэзіі біскуп Юрый Касабуцкі.
У гаміліі ксёндз Алег Шпець SChr, які паходзіць з парафіі святых апосталаў Пятра і Паўла ў Іўі, дзе ксёндз Гавэцкі шмат гадоў быў пробашчам, звярнуў увагу на тры словы, якімі можна ахарактарызаваць спачылага.
Першае з гэтых словаў, як адзначыў ксёндз Алег, — «прысутнасць», бо ксёндз Ян заўсёды стараўся прысутнічаць на розных урачыстасцях, куды яго запрашалі. У якасці другога слова святар назваў «ахвярнасць»: як патлумачыў ён, ксёндз Гавэцкі ўмеў дзяліцца, асабліва з тымі, каму была патрэбна падтрымка. Трэцім словам, на думку ксяндза Алега, з’яўляецца «чуласць»: ксёндз Ян умеў спачуваць і падтрымліваць тых, хто сустракаўся з рознымі жыццёвымі цяжкасцямі.
Пасля Імшы яе ўдзельнікі скіраваліся на Францішканскія могілкі Гродна, дзе памаліліся на месцы пахавання ксяндза Яна Гавэцкага, прамовіўшы Вяночак да Божай Міласэрнасці.
