З 19 па 21 лютага ў кляштары Меншых Братоў Капуцынаў, што дзейнічае пры парафіі святога Францішка Асізскага ў Мінску, праходзіў чарговы, Чацвёрты Капітул Кустодыі Беларусі.
Раз на тры гады, паводле заканадаўства Ордэна, кожная яго структурная адзінка збіраецца, каб падвесці вынікі жыцця і дзейнасці супольнасці з часу ад папярэдняга Капітулу, распазнаць знакі часу ў сучасным свеце і Касцёле, разам вызначыцца адносна кірункаў і спосабаў дзеяння на будучыню.
Важным заданнем Капітулу з’яўляецца абранне новага кіраўніцтва структурнай адзінкі, якое асаблівым чынам паклікана да рэалізацый прынятых пастановаў і да клопату аб супольнасці братоў у бліжэйшай будучыні.
Як падкрэсліў арцыбіскуп эмэрыт Тадэвуш Кандрусевіч падчас святой Імшы на распачацце папярэдняга Капітулу Кустодыі, які праходзіў у 2021 годзе, «супольнасць братоў капуцынаў з’яўляецца найбольшай манаскай супольнасцю ў нашай краіне. Яе браты ўдзельнічаюць ў розных сферах жыцця Касцёла і грамадства нашай краіны».
Сёння браты прысутнічаюць ў шасці месцах у Беларусі і ў двух па-за яе межамі; усяго Кустодыя Беларусі налічвае 30 братоў.
Падчас Капітулу новым вышэйшым настаяцелем меншых братоў капуцынаў у Беларусі быў выбраны брат Алег Шэнда OFMCap, які раней, у 2015–2021 гадах, ужо нёс служэнне кусташа. Як дапамога для яго была выбрана Рада з чатырох братоў.
Час Капітулу быў вельмі плённым, бо на ім кожны брат Кустодыі мог падзяліцца сваімі планамі, надзеямі, цяжкасцямі і ў супольнасці братоў шукаць Божую волю для Ордэна Меншых Братоў Капуцынаў у Беларусі.
Былі прынятыя канкрэтныя рашэнні і вызначаныя кірункі развіцця на бліжэйшыя тры гады, што дае надзею на багаты плён служэння супольнасці Богу, Касцёлу і людзям.
